Ho Lei Anti Korupsaun ne’ebe to’o agora seidauk aprova iha Parlamentu Nasional, Diretor Lalenok Ba Ema Hotu (LABEH), Julio Gil da Silva, konsidera Parlamentu laiha intensaun atu kombate korupsaun iha rai laran, tanba lei ne’e budu deit ona.
Diretor LABEH, Julio Gil da Silva, hateten esbosu lei ne’e ba iha Parlamentu Nasional liu husi konsultasaun publiku, no agora LABEH halo tiha ona ho lian Inglesh ,Portugues no lian Tetun.
“Ami hamutuk ho kolega sira husi Luta Hamutuk mak ami halo esbosu ne’e ba iha Parlamentu Nasional,” Diretor LABEH, Julio Gil da Silva dehan, iha Kampung Baru, Dili.
Entretantu Deputadu Paulino Monteiro, hateten Parlamentu seidauk debate Lei Anti Korupsaun ne’e, tanba resesu hela.
“Iha loron 16 Setembru mak deputadu hotu-hotu tama fila fali atu hala’o ami nia kna’ar hanesan bai-bain,” Deputadu Monteiro dehan.
Deputadu ne’e realsa katak,esbosu lei sira ne’ebe mak oras ne’e dadauk sei iha parlamentu seidauk diskuti mak Lei Rai nian, Lei Munisipiu inklui Lei Anti Korupsaun nian.
“Lei sira ne’e Komisaun A tau ona iha sira nia ajenda ne’ebe tempu resesu ne’e deputadu sira tama fila fali mak foin bele foti iha plenaria,” Deputadu Moteiro katak.
Iha fatin hanesan Deputada Bankada CNRT, Bendita Moniz Magno dehan, Lei Anti Korupsaun ne’e Komisaun A nia kompetensia no to’o agora seidauk ajenda atu diskuti.
“Mais ho menus Komisaun A sira bolu ona atu submete lei ne’e mai parlamentu atu halo lei ne’e,” Deputada Magno hato’o.
