Dadaun ne’e iha ona populasaun uma kain 99,000 mak asesu ona ba energia eletrisidade iha teritoriu tomak husi Sentral Eletrika Hera no Betano.
Diretor Jeral iha Sekretariu Estadu Eletrisidade (DJ-SEE), Virgilio Guterres, hateten hahu husi tinan 2009 to’o mai agora komunidade uma kain 50% mak asesu ona ba iha eletrisidade.
“Ita agora instala 250 mega watt ne’ebe kapasidade instalada mais sufisiente ita atu fornese energia ba publiku tomak,” DJ Guterres hateten, iha Betano, Manufahi.
Nia dehan, sentral eletrika rua ne’e sufsiente ba publiku tomak inklui mos bele atrai investor sira mai investe iha Timor-Leste.
Entretantu Administrador Distritu Manufahi, Filomeno Tilman, dehan povu tomak sei hetan benefisiu husi Sentral Eletrika Betano, liu-liu ba komunidade Manufahi .
“Tanba ne’e ita hotu kontribui oinsa atu asegura sentral eletrika ne’e,” Administrador Tilman hato’o.
Admistrador ne’e esplika , sentral eletrika ne’e komunidade hotu sei hetan benefisiu hodi halao aktividade negosiu hodi sustenta ba familia uma laran.
“Tanba ne’e parte ami nudar autoriedade lokal ami sei fo kontribuisaun hodi asegura sentral eletrika ne’e iha are ne’e,”autoriedade lokal ne’e hato’o.
Iha fatin hanesan Maria da Costa Komunidade Suku Betano sente orgolhu tanba asesu ona eletrisidade.
Komunidade ne’e hateten,agora sira la lakon tan sira nia osan hodi sosa lilin no sosa mina rai tanba ahi tama ona iha sira nia uma.
“Uluk ami sunu deit lampu mak ami nia oan sira estuda iha tempu kalan maibe agora ami kontente ona tanba eletrisidade tama ona iha ami nia uma,”da Costa hato’o.
Nia esplika ,eletrisidade nia benefisiu barak ba sira tanba bele halao vida ekonomia hodi sustenta ba familia uma laran.
“Hau sente ami asesu ona eletrisidade ami bele halao negosiu ki’ik iha uma nia uma ida-idak,” da Costa katak.
