Liu husi enkontru revizaun semestral ho parseirus dezenvolvimentus sira, Ministerio Saude konsege identifika problemas saude hitu mak presiza fo atensaun makas iha fulan hat mai atu asegura servisu saude ba povu Timor –Leste. 
Jose Dos Reis Magno, nudar Diretor Jeral Ministerio Saude (MS) rekonese setor saude sei iha problemas barak, maibe liu husi enkontru ne’e sira deside fo atensaun no buka solusaun atu resolve problema hitu ne’ebe iha.
Problema hitu ne’e mak hanesan kestaun mortalidade inan ho oan sei as 557/100.000, malnutrisaun 58%, problema saneamentu baziku no moras ne’ebe domina iha fulan hirak ne’e nia laran inklui mos moras hadaet liu husi relasaun seksual buka atu prevene no seluk tan.
“Iha problema barak maibe problema hitu ne’e mak sei hetan atensaun makas husi ministerio saude hare ba oin hodi resolve problema sira ne’e,” dehan DJ Magno, bainhira partisipa iha ekontro revizaun semanal iha sala enkontru Ministerio Saude Kaikoli Dili.
Tuir nia, dadaun ne’e sira iha ona planu ne’ebe konkretu atu resolve problema sira ne’e liu husi tau medikus sira iha nivel sukus no realize programa vizita domisiliariu ba kada uma kain atu fo asistensia saude ne’ebe diak ba povu sira iha area remotas tanba povu barak liu hela dok susar asesu ba fasilidade saude no Estrada rasik.
Nia rekonese esforsu ne’ebe MS hala’o ona atu lori asistensia saude ba besik povu ne’e seidauk 100 % maibe sira sei esforsu makas atu hadia problemas sira ne’e hotu tanba sira iha komitmentu bo’ot atu lori duni asistensia saude ba povu sira.
Entretantu, Vise Primeiru Ministru, Fernando Lasama de Araújo ne’ebe marka prezensa mos iha enkontru ne’e, hateten oportunidade sira hanesan ne’e importante tebes atu bele halo evaluasaun ba servisu sira hotu no bele identifika problemas sira ne’ebe lao hela iha ministerio laran.
Nia dehan setor saude iha problemas barak, maibe la signifika mos buat hotu resolve iha tinan ida nia laran, importante mak tenke kreativu atu hare problemas sira ne’ebe urgente hodi resolve.
“Hau hanoin problema ida importante mak mentalidade funsionario sira nian hahu husi diretores sira problema tenke halakon hanoin sektoral tuir ida –idak nia gostu maibe tenke hanoin tuir sistema, hau espera sira bele resolve situasaun sira ne’e iha tempu badak mai,”dehan Lasama hafoin partisipa enkontru.
