Prezidenti Republika, Taur Matan Ruak (TMR) husu ba veteranus sira atu hasees an husi projetu tanba lei la permiti ba sira.
Xefe Estadu hato’o kestaun ne’e relasiona ho veteranus balun durante ne’e hetan projetu husi governu.
“Prezidenti alerta ba imi imediatamente, imi hasees an husi ida ne’e no apela ba kintu Governu konstitusional atu labele fo apoia ba inisiativa sira ne’e,” Prezidente TMR husu, iha serimonia aniversariu loron FALINTIL (20/08) ba -38, iha Betano, dsitritu Manufahi.
Tuir nia, aktu ida ne’e kontra lei inklui fo ezemplu at ba jerasaun foun sira, tanba ne’e tenke para agora.
Hatan ba esteitmentu ida ne’e, Sekretariu Estadu Asuntu Kombatente ba Libertasaun Nasional, Julio Sarmento da Costa alias Meta Malik, hateten veteranus kaer projetu la kontra lei, tanba la iha lei ida kona ba ida ne’e.
“Hau hanoin ida ne’e, Prezidenti fo atensaun deit, katak veteranus sira hakat liu ona linha vermelha ida, maibe buka kuidadu an atu labele estraga naran veteranus ne’e,” Sekretariu Estadu Metamalik dehan.
Tuir nia, la’os veteranus mak kaer projetu maibe ema mak individu mak submete hakarak ba buka nia vida.
Tanba ne’e nudar Sekretariu Estadu nia la rekomenda ba veteranus sira atu kaer projetu.
Entretantu veteran Saturnina Alves da Silva, dehan nia an nunka kaer projetu ruma husi governu.
“Maibe kolega veteranus balun mak kaer projetu,” da Silva dehan.
