Polisia Nasional Tranzitu konsege prende motorizadas 35 durante fulan Agustu 2013, tanba para iha linha zebra cross.
Komandante Polisia Nasional Tranzitu, Inspektor Xefe Antonio L.C.Soares, hateten lei tranzitu nian bandu atu motorista sira labele para arbiru iha linha zebra cross.
Nia dehan, husi motorizadas 35 ne’e kompostu husi kareta 10 no motor hamutuk 25.
“Ami halo operasaun iha sinais besik Toko Hidayat, Palasio Governu nia oin no Ministeriu Finansas, depois de ami prende ami haruka sira selu multa,” Komandante Soares dehan, iha Kaikoli, Dili.
Alem de selu multa, nia afirma sira (polisia tranzitu) mos fo sira edukasaun sivika, atu nune’e sira bele iha konesementu ne’ebe klean, katak labele para motor ka kareta iha linha zebra cross.
“Balun laiha duni konesementu no balun laiha konsiensia. Ida laiha konsiensia ne’e maka dala ruma hetan prende dala rua,” Komandante ne’e katak.
Tuir nia, impaktu bo’ot bainhira motorist sira para iha linha zebra cross, halo ema la’o ain sira labele hakat.
Iha fatin seluk Deputadu Mateus de Jesus, hateten polisia iha duni kompetensia atu foti duni atuasaun hanesan ne’e, tanba ne’e atitude ne’ebe la kumpri regras.
“Kuandu hanesan ne’e ema atu ultra pasa, la liu ona zebra cross bele fo mos ameasas ba ema nia vida,” Deputadu de Jesus.
Iha parte seluk komunidade Antonio da Costa, dehan motorist barak mak laiha konesementu no konsiensia, dalaruma ema hakat dadaun, sira liu deit, ne’ebe presiza duni fo edukasaun ba sira.
