Ministeriu Saude rekonese katak, sei falta ambulansia barak iha fasilidade saude sira iha teritoriu tomak, tanba ambulansia barak mak tinan 10 liu ona no at.
Diretor Nasional Apoiu Servisu Hospitalar e Encaminhamentu Ministeriu Saude (MS), Horacio Sarmento da Costa, hateten ambulansia iha distritus, kada distritu iha ambulansia neen mak at grave no presiza halo reparasaun total, no iha hat deit mak iha fase manutensaun.
Tuir nia, dadaun ne’e kareta multi funsaun ne’ebe apoiu atu tula moras no tula pesoal saude sira hala’o programa SISCA hodi fo asistensia saude ba komunidade sira.
Nia afirma, iha tempu badak sira sei halo aprosimasaun ho ofisina balun hodi halo manutensaun ba ambulansia distritu ne’ebe nia ambulansia at hotu ona, hanesan distritu Manufahi no Ermera mak prioridade, tanba at hotu ona so iha deit kareta multifunsaun.
“Iha ona planu atu tau orsamentu iha tinan ida ne’e hodi responde ba problema ambulansia iha teritorio tomak,” Diretor Sarmento dehan, iha Kaikoli, Dili.
Iha oportunidade ne’e nia mos informa katak iha pesoal balun mak uja kareta multifunsaun no ambulansia hodi tula aimaran maibe difisil atu identifika kareta ne’e husi distritu ne’ebe.
“Hau rasik mos hare duni maibe atu identifika katak kareta ne’e husi distritu ne’ebe mak susar atu hare tanba letra mos ona,” Diretor Sarmento katak.
Nia hatutan, liu katak karik sira kaer ho liman sira sei foti sansaun ba pesoal sira ne’ebe uza kareta hodi halo aktividade privada tuir lei funsaun publika.
Iha parte seluk, Prezidente Komisaun F Parlamentu Nasional (Saude, Edukasaun, Veteranus no Igualidade), Virgilo da Costa Hornai hateten katak ambulansia ne’e problema ne’ebe bo’ot tanba iha fasilidade hotu kuaze ambulansia at hotu la iha manutensaun.
Nia hatutan,problema falta ambulansia iha fasilidade saude ne’e tanba sistema aprovizionamentu ne’e mak birokrasia liu realidade ambulansia husi distritu ida at tenke lori to’o iha nasional mak foin halo manutensaun.
“Intermus kondisoens sai tiha ona problema prezudika tan ho sistema aprovizionamentu ne’ebe birokrasia tebes implika ba servisu ospital nian liu –liu transferensia moras husi fasilidade saude iha ba ida,” Deputadu Hornai katak.
