Sekretariu Estadu Politika Formasaun Profesional no Empregu sei loke industria ki’ik ida kona ba produsaun fatuk naturaze (batu alam) nian iha area Behau, distritu Manatuto, iha tinan ida ne’e (2013).
Sekretariu Estadu Ilidio da Costa, hateten dadaun ne’e sira kolabora ona ho kompania local Coluna Coral, fo treinamentu kapasitasaun ba foinsa’e sira hamutuk 15 husi sentru treinamentu Don Bosco kona ba batu alam, atu responde ba planu ne’e.
Nia hatutan,agora dadaun sira hare hela orsamentu ba planu ne’e hodi produs fatuk sira ne’e iha rai laran, tanba Timor –Leste potensial ba batu alam.
“Proposta husi Primeiru Ministru iha ona hau nia meja, hau hare deit orsamentu atu aloka sei tau buat ki’ik ida iha Behau, marmer fatin,” SE da Costa hateten, iha Dili.
Iha parte seluk, Deputadu Eladio Faculto, konkorda ho inisiativa governu nian ne’e tanba loke kampu servisu ba joven sira, maibe tenke planeadu, tanba realidade programa barak mak laiha nia kontiudade no sustentabilidade hanesan empregu rural.
“Dala barak liu hau hare ita halo sensasional deit para hatudu katak ita bele halo buat ruma, maibe to’o ikus buat ida laiha, hau prekupa ho estrada ne’ebe loke iha area rurais ke’e hotu, laiha nia manutensaun,” Deputadu Faculto kritika.
Tanba ne’e nia husu ba, atu iha koordenasaun no planu ne’ebe mak diak ba inisiativa ida ne’e, no presiza tau orsamentu ne’ebe nato’on, tanba loke industria, la’os buat kiik ida.
