Ministeriu Obras Publiku hadia emergensia ponte no estradas ne’ebe mak hetan estragus tanba impaktu husi udan bo’ot ne’ebe mak akontese iha fulan hirak liu ba, liu-liu iha distritu Viqueque.
Sekretariu Estadu Obras Publiku, Luis Vas Rodrigues hateten, durante udan bo’ot ne’e akontese, komunidade iha costa sul ne’e afetadu tebes, hanesaun iha viqueque villa, Subdistritu watulari, sub-distritu Watucarbau iha ponte no estrada barak mak hetan estragus no kondisaun hanesan akontese mos iha distritu Covalima no Lospalos.
“Agora dadaun kompania sira halo konstruksaun para atu bele hala’o sira servisu sira ne’e, mais sira sei hein konsultan atu halo dezenhu ho BOQ no atu identifika ponte no estrada ne’ebe maka atu halo uluk,” Sekretariu Estadu Rodrigues dehan, iha Dili.
Nia hatutan, agora dadaun mos husi ministeriu sei monta konsultan iha kada distritu ne’e hodi bele foti baze de dadus kona ba estrada hira maka hetan estragus no ponte hira maka hetan estragus durante dezastre naturais ne’e.
“Hodi nune’e ita bele hatene katak kada distritu ne’e ita tenke hasai osan hira,” Sekretariu Estadu katak.
Iha parte seluk Deputadu Inacio Moreira, suporta tebes inisiativa governu ne’e, atu oinsa bele halo projeitu ne’e ho emergensia tanba komonidade mos persija dalan no ponte.
“Maibe tenke iha estudu no halo dezenhu ho profuntu, la’os dehan emergensia ne’e duni halo arbiru deit, emergensi maibe tenke iha nia rezultadu ne’ebe maka kualidade,” Deputadu Moreira katak.
Iha fatin seluk komunidade Suai Isaias Sarmento, hateten, fatin ne’ebe maka sira hela ba hetan duni estragus ne’ebe maka halo sira mos sente triste, estrada no ahi elektrisidade mos hetan estragus, tanba ne’e husu ba governu atu toma atensaun ho emergensia.
