Atu re-entre fila fali feto foinsa’e ne’ebe droup out tanba gravida seidauk bele lansa, tanba ne’e esperiensia foun ba governu no presiza analiza klean.
Vise Ministra Edukasaun Ensino Baziku, Dulce de Jesus Soares, hateten ne’e la fasil, Parlamentu Nasional, governu inklui sosiedade sivil tenke tur hamutuk, halo estudu komparativu ida antes kria politika ida.
Nia dehan, politika bele iha, maibe implementasaun ne’e la’os fasil, presiza sosializa informasaun sira ne’e ba profesores sira liu husi formasaun profesores, komunidade atu ema hotu komprende no bele simu sira fila ba eskola.
“Ne’e buat ida foun tebes iha ita nia rain, kuandu profesores sira la preparadu atu tau matan ba labarik feto sira ne’ebe iha problema hanesan ne’e, liu –liu eduka alunus sira seluk hodi simu nia maluk sira ne’e iha eskola,” Vise Ministra Soares dehan, hafoin partisipa loron mundial UNFPA, iha Sentru Konvensaun, Dili.
Vise Ministra ne’e hatutan, dadaun ne’e sira fo liu atensaun ba prevensaun liu husi sosializasaun ba ema hotu, atu bele iha konsiensia ne’ebe hanesan, katak isin rua sedu ne’e ladiak, hamate futuru ema ida –idak nian tantu feto ou mane.
Entretantu, Primeira Dama, Isabel Ferreira, hateten kria politika ida ne’e diak maibe politika la’os solusaun atu resolve situasaun ida ne’e.
Tuir nia, forma uma kain la’os fasil, presiza responsabilidade ida ne’ebe bo’ot, tanba ne’e foinsa’e sira tenke iha mehi no planu ida diak ba sira nia moris iha future, labele foti desizaun ho ansi.
“Hau hanoin bele, mais ida ne’e la ajuda ita nia feto ran sira atu alkansa sira nia mehi ruma, atu sai ema ne’ebe importante, tanba gravidas fo responsabilidade ida bo’ot nudar inan,” Primeira Dama Fereira katak.
Antes ne’e reprejentante organizasuan Rede Feto, Laura Abrantes, husu atu governu kria lalais politika eskrita ida hodi asegura feto foinsa’e sira ne’ebe gravidas durante eskola bele fila ba eskola hodi remata sira nia estudu.
Tuir nia, politika ida ne’e rekomenda husi Komite Konvensaun Halakon Forma Diskriminasaun Hotu Hasoru Feto (CEDAW) iha Nova Yorke ba governu Timor –Leste, iha relatoriu espesifiku CEDAW setor edukasaun no saude iha tinan 2011.
“Ita nia governu simu rekomendasaun sira ne’e no prontu atu implementa hodi asegura ema hotu nia direitu ba edukasaun inklui mos sira ne’e,” Abrantes sujere.
