Vise Ministra Saude, Maria do Ceo hateten, ministeriu seidauk bele halo deslokasaun ba medikus foun 400 resin ne’ebe gradua iha fulan hirak ba kotuk, tanba ezekusaun orsamentu jeral ba tinan 2013 tarde.
Maske seidauk halo deslokasaun ba fasilidades saude hotu iha teritoriu tomak, maibe nia dehan, ministeriu kontinua fo treinamentu baziku kona ba kazu emergensia nian, hodi hametin sira nia konesementu antes desloka.
“La’os salariu, maibe sei hein osan ida ne’ebe atu halo deslokasaun, ne’e deit e ami hatama ona karta ba iha Funsaun Publika, hein despaisu finansas hasai osan, sira bele ba ona,” Vise Ministra do Ceo dehan, iha Kaikoli, Dili.
Iha parte seluk, Medikus foun, Amaro Assuncão Corjino Correia, hateten nudar Timor oan, sira iha obrigasaun atu servi povu ida ne’e no hasai povu husi moras oi-oin ne’ebe afeta ba saude povu nian.
“Ami prontu ona atu desloka iha fatin hotu iha teritoriu tomak, ami hein deit husi ministeriu,” Mediku Correia katak.
Entretantu Deputadu Eladio Faculto, husu ba Ministeriu Saude atu aselera lalais prosesu ne’e, nune’e medikus sira ne’e bele desloka ona ba iha komunidade sira nia le’et tanba komunidade sira iha area rurais presiza los prezensa medikus.
Deputadu ne’e mos husu ba Ministeriu Saude, atu fasilita sira ho fasilidades ne’ebe sira presiza, nune’e sir abele fo atendementu ne’ebe diak ba komunidade sira iha area remotas.
“Motorizadas hirak ne’ebe ministeriu sosa barak-barak ne’e bainhira mak atu fahe,” Deputadu Faculto preokupa.
