Aprezentasaun relatoriu periodiku Konvensaun Eliminasaun ba Diskriminasaun Hotu-hotu Kontra Feto darua no datolu, tuir Sekretaria Estadu ba Promosaun Igualidade, Idelta Maria Rodrigues katak, sira hein deit agenda husi Komite CEDAW, iha Nova Yorke.
Sekretaria Estadu ba Promosaun Igualidade (SEPI), Rodrigues dehan, husi sira nia parte preparadu no bainhira deit mak husi Komite CEDAW konvida, sira pronto atu ba aprezenta.
“Lolos relatorio ne’e, iha fulan Maiu liu ba submete ona ba iha Komite CEDAW, maibe la konsege tanba sei iha dadus balun mak presiza kolekta tan hodi haforsa relatoriu ne’e sai forte no kualidade,” SE Rodrigues, iha Dili.
Maibe antes ne’e, nia dehan sei aprezenta uluk relatoriu ne’e ba iha Konselhu Ministru hodi hetan apresiasaun, tanba relatoriu ne’e en nome estadu Timor-Leste nian kona ba dezenvolvementu igualidae jeneru.
“Ita hein fali kalendariu husi Komite CEDAW, ita seidauk hatene bainhira, hau hanoin estadu Timor-Leste pronto atu ba halo aprezentasaun, se ita simu ona agenda,” SE Rodrigues dehan.
Nia dehan, relatoriu ida ne’e atu responde ba rekomendasaun ne’ebe Komite CEDAW iha Nova Yorke hato’o ba estadu Timor-Leste iha primeiru relatorio espesifiku intervensaun ne’ebe governu halo ona hodi promove igualidade jeneru.
Importante mak , nia afirma, tenke prepara dadaun ona ekipa tekniku sira husi kada ministeriu, tenke iha konesementu ne’ebe diak,tanba ekipa ne’e mak sei responde ba perguntas sira ne’ebe Komite CEDAW sei husu ba.
Entrentantu Laura Pina,Diretora Organizasaun Patria ne’ebe durante ne’e halo monitorizasaun ba implementasaun rekomendasaun husi Komite CEDAW, rekonese katak Timor –Leste iha ona progresu diak ba dezenvolvementu feto, maibe presiza fo atensaun urgente iha parte balun.
“Sei iha diskriminasaun no violensia hasouru feto sei as nafatin no ami hein katak SEPI bele relata tuir realidade ne’ebe iha, tantu iha area saude, edukasuan, ekonomia, seguransa no seluk tan,” Diretora Pina esperansa.
Iha parte seluk, Vise Ministra Edukasaun, Dulce Soares, katak sira prontu atu simu rekomendasaun sira ne’ebe komite CEDAW sei hato’o ba estadu Timor –Leste hodi integra iha planu asaun annual ministeriu nian hodi asegura igualidade jeneru.
“Ami prontu atu simu rekomendasaun sira ne’ebe husi Komite CEDAW atu bele integra iha planu asaun anual Minsiteriu Edukasaun nian hodi asegura implementasaun igualidade jeneru iha setor edukasaun,” dehan Vise Soares.
