International Republican of Institute organiza programa rona povu nia lian iha sub-distritu Lospalos, distritu Lautem, iha 21 Junu 2013, foin lalais ne’e.
Programa rona povu nia lian ne’ebe involve mos husi membru Parlamentu Nasional nain hat (sai orador), hala’o ho obejtivu atu rona direitamente povu nia preokupasoens ka problema ne’ebe sira infrenta durante ne’e.
Senior Program Officer IRI, Karlito Nunes espera katak, preokupasoens hirak ne’ebe povu hato’o ne’e, membru Parlamentu Nasional sira sei rekomenda ba iha governu.
“Sira nain hat ne’e bele hato’o ba ministeriu ne’ebe relevante, tuir problema ne’ebe povu hato’o ba,” Senior Program Officer IRI ne’e esperansa, iha Lospalos.
Nia dehan, atividade hanesan ne’e hala’o ona iha distritus no sub-distritu sira hanesan iha sub-distritu Maliana, Ermera, Same no sub-distritu Lospalos, noIRI sei halo relatoriu ida kona ba issue ka problema ka preokupasoens husi komunidades ba Parlamentu Nasional liu husi bankada ida-idak.
Entretantu Administrador Distritu Lautem, Zeverino dos Santos Sequeira, fo agradese ba IRI ne’ebe organiza programa ida ne’e, hodi komunidade Lospalos bele hato’o sira nia preokupasoens ne’ebe sira hasouru ba membru Parlamentu Nasional.
“Espera katak membru Parlamentu nasional nain hat ne’e bele hato’o ba iha governu, preokupasoens ne’ebe povu hato’o ba sira,” Administrador Sequeira.
Iha oportunidade ida ne’e, membru Parlamentu Nasional mos esplika sira nia knar ba iha komunidade sira, tanba barak mak ladauk hatene no komprende knar parlamentu nian.
Iha fatin hanesan, Deputada Albina Freitas Marcal ne’ebe sai oradora iha programa ne’e, katak progrma ne’e kapas tebes, tanba sir abele rona direitamente povu nia problemas.
“Programa ne’e hamosu prespektiva ne’ebe diak, tanba liu husi dialogu ne’e ita bele fahe informasaun ba malu, la’os ita bo’ot sira maka atu rona husi ami, maibe ami mos presiza rona husi imi,” Deputadu Marcal dehan.
