Koordenador KNPEHMTL, Nuno Rodrigues dehan, sira hahu hakereka ona livrus kona ba papel feto ba libertasaun nasional, maibe agora atrazu tanba falta orsamentu.
Tuir Koordenador Komisaun Nasional Peskiza no Elaborasaun Historia Mulher Timor-Leste (KNPEHMTL), katak dokumentus balun seidauk kompleta no presiza tan informasaun husi fonts principal balun, iha prosesu hakerek livru ne’e.
“Ami foin halo aprezentasaun ba kapitulu ida deit ba hakerek nain sira kona ba krese, depois para tanba apoia husi governu tarde atu kompleta dadus husi kapitulu seluk,” Koordenador Rodrigues dehan, iha Balide, Dili.
Maske nune’e nia dehan, sira sei esforsu aan finalize hakerek livru kona ba papel feto ba libertasaun nasional iha tinan ida ne’e, maibe la garante bele halo lansamentu iha komemorasaun loron nasional feto (03 Novembru) tinan 2013 ne’e, tuir Sekretaria Estadu ba Promosaun Igualidade nia hakarak.
“Tanba sei iha dokumentus barak mak hakerek nain sira presiza,” Koordenador KNPEHMTL ne’e katak.
Enkuantu governu apoia orsamentu ba projetu ne’e desde inisiu kedas, no ba tinan ida ne’e ho montante $100,000 nune’e bele finalize.
Livrus ne’e rasik, nia tenik, sei iha pajina 400 resin, topiku iha 14 mak; partisipasaun feto iha ai laran,diplomasia, religiaun, krese no kolonial inklui informasaun balun ne’ebe husi ema individu balun hakerek ona kona ba kontribuisaun feto iha luta libertasaun.
Iha parte seluk Albina Marçal Freitas, nudar fontes infromasaun, katak istoria ne’e importante tebes ba jerasaun foun sira atu hatene, lala’ok luta libertasaun lolos hodi nune’e sira labele halo tan krime ne’ebe akontese ona iha pasadu.
“Hau koalia espesifiku liu konaba hau nia partisipasaun iha prosesu luta durante 24 anos istoria iha ailaran, vila laran no durante iha prizaun ida ne’e mak hau hato’o ba sira atu hakerek hodi fo hanoin ba jerasaun foun sira hatene kotiudu istoria lolos,” dehan Albina.
Entretantu, Agostinha Ximenes, nudar jerasaun foun hateten, ne’e hanoin ne’ebe diak no positive tebes, nune’e jerasaun foun sira tuir mai bele hatene kontribuisaun feto Timor-Leste iha tempu resistensia.
“Hau hanoin ita iha ona livru barak koalia kona ba lideransa balun inklui heroi no heroina balun, maibe seidauk iha livru espesifiku koalia kona ba kontribuisaun feto iha luta indepedensia, ne’ebe livru ida ne’e importante tebes,” dehan Ximenes.
Nia espera katak, prosesu hakerek kona ba livru ne’e bele hotu lalais, nune’e ema hotu bele asesu ba livru ne’e no livru bele sai motivasaun ba jerasaun foun,liu-liu feto sira atu banati tuir.
