Labarik nain 74 ho kazu mal nutrisaun ne’ebe durante ne’e halo rehabilitasaun iha Sentru Rehabilitasaun Organizasaun Hiam Health, nain 54 konsege rekopera sira nia saude no fila hikas ona ba sira nia uma.
Adjuntu Diretor Hiam Health (HH), Antonio Guterres katak, labarik mal nutrisaun 74 ne’e tama iha sentru rehabilitasaun HH hahu fulan Janeiru to’o Marsu hodi halo rehabilitasaun ba sira nia kondisaun iha sentru ne’e.
Nia hatutan, alem de nain 54 ne’ebe rekopera ona, labarik nain 11 transfere ba iha Ospital Nasional Guido Valadares (HNGV), atu hetan tratamentu intensive tanba komplikadu ho moras TBC, Diarea, Lumbringa no seluk tan, enkuantu nain sia (9) seluk alta obrigatoriu husi familia.
Enkuantu hahu fulan Abril to’o Maiu tinan 2013, iha labarik nain 17 mak hala’o hela prosesu rehabilitasaun iha sentru rehabilitasaun HH nian to’o agora.
Alem de ne’e, sentru rehabilitasaun HH mos simu familia pasiente hamutuk nain 96, eduka no hasa’e sira nia konesementu kona ba importansia nutrisaun ba labarik.
“Ami nia sentru ida ne’e tau importansia, oinsa atu eduka no hasa’e konesementu familia sira nian kona ba saude no nutrisaun liga ba agrikultura,” dehan Adjuntu Guterres.
Kona ba pasiente nain 11 ne’ebe halo tratamentu intensive iha HNGV, nia dehan, sira sei halo rehabilitasauniha sentru ne’e, enkuantu familia sira tuir formasaun kona ba mal nutrisaun, nune’e ba sira ne’ebe alta obrigatoriu husi familia, nafatin halo koordenasaun ho fasilidade saude kontrola labarik sira.
Entretantu familia pasiente, Amelia da Costa ne’ebe hela mos iha sentru ne’e,sente kontente no apresia ho tratamentu no formasaun ne’ebe Hiam Health oferese ba sira, liu –liu ba sira nia oan hodi hetan kondisaun saude ne’ebe diak.
“Durante ne’e ami la hatene, oinsa atu fo hahan ne’ebe ho nutrisaun ba ami nia oan tanba ne’e iha fatin ida ne’e ami sente buat ne’ebe ami seidauk hatene presiza atu aprende diak liu tan, hodi prevene mal nutrisaun,” Amelia kontente.
Tanba ne’e nia promote katak, sei implementa tuir material ne’ebe sira hetan durante iha sentru ne’e iha sira nia uma, liu-liu tein aihan husi produtu local ne’ebe iha nutrisaun diak ba oan sira nia saude.
Tuir dadus husi gabinete Sistema Informasaun Ministeriu Saude (SIS) hatudu, katak iha tinan 2012 labarik hamutuk 3,867 (8, 2%) mak hetan mal nutrisaun grave husi total labarik 47,360 (25%) ne’ebe tetu iha fasilidade saude hotu kada fulan.
“Se labarik sira ne’e mak mai tetu hotu karik, nia numeru la’os ida ne’e deit, sei as liu ida ne’e no seidauk konta ho mal nutrisaun moderadu hamutuk, bele as liu,” dehan Xefe SIS, João da Silva.
Nia dehan, ministeriu esforsu an nafatin, atu halo prevensaun ba mal nutrisaun liu husi programa fahe aihan (batar uut, aimoruk vitamina A ba inan isin rua sira, sosializasaun edukasaun prevensaun ba komunidade, halo demostrasaun ba produtu local.
