Ministru Agrikultura no Pescas, Mariano Asanami Sabino hateten,partisipasaun setor privadu iha area agrikultura durante ne’e minimu liu.
Maske nune’e nia dehan, la’os la involve liu maibe iha balun partisipa duni iha setor agrikultura nian.
“Barak maka seidauk involve, liu-liu ami konvida sira iha area pekuaria no iha hortikultura nian ne’ebe maka produsaun bele tama lalais, maibe seidauk iha sinal diak ida,” Ministru Sabino dehan, foin lalais, iha Sentru Konvensaun,Dili.
Tanba ne’e nia dehan, ba futuru Ministeriu Agrikultura e Pescas (MAP) sei koko koalia ho setor privadu sira atu oinsa sira bele involve iha area ida ne’e.
“Agora dadaun iha duni setor privadu ki’ik sira maka apoia malu, hanesan iha distritu Aileu no Maubise, maibe sira investe liu iha area kafe nian,” Ministru Sabino tenik.
Iha parte seluk Emprezariu Mario dos Santos dehan, sira pronto atu partisipa iha area agrikultura nian, kuandu iha tender.
“Tenke loke tender, atu nune’e setor privadu sira bele kompete no presiza mos fo workshop ruma, atu nune’e setor privadu sira bele hatene katak agrikultura ne’e mos hanesan area ne’ebe maka importante,” Emprezariu Santos sujere.
Entretantu Deputada Florentina Perreira Smith hateten, setor privadu sira tenke involve iha setor hotu – hotu.
“Maibe karik durante ne’e sira ladun involve no investe iha area agrikultura, tanba sira seidauk hatene, katak agrikultura ne’e nudar setor ne’ebe mak importante mos,” Deputada Smith katak.
