Membru Komisaun E Parlamentar preokupa no lamenta ho implementasaun projetu bee moos iha Distritu Suai ne’ebe gasta osan $200,000 resin maibe to’o agora tanki sei mamuk hela.
Deputadu Inacio Moreira, membru Komisaun E (Infraestruturas, Transporte no Komunikasaun), hateten,projetu bee moos iha Distritu Suai, iha fatin tolu (iha Fatumea, Lakonak no Suai Vila) maske instalasaun remata ona maibe tanki kontinua mamuk.
“Problema ne’e ha’u hanoin tenke toma responsabilidade ba nain ulun hirak ne’ebé halo desizaun ba instalasaun bee moos hirak ne’e,” sujere Deputadu Moreira, hafoin halo fiskalizasaun ba projetu bee moos iha Suai, foin lalais, iha Parlamentu Nasional.
Deputadu ne’e dehan, bee moos iha Fatumea ne’e, monta tiha ona mota bomba inklui jeradór, maibe kombustivel laiha.
Iha fatin hanesan Prezidente Komisaun E, Deputadu Pedro dos Martires da Costa, katak problema bee moos la’os deit iha capital Dili maibe iha distritus, komunidade sira preokupa kona ba bee moos.
“Hanesan komunidade iha Suai Vila, sira preokupa maka’as kona ba bee moos, tanba ne’e governu tenke iha politika ne’ebe diak hodi fornese bee moos ba komunidade sira iha area rural,” Prezidente Komisaun E ne’e dehan.
Tuir nia, povu hakilar kona ba bee moos la’os foin agora maibe desde uluk kedas e nudar reprezentante povu iha Parlamentu Nasional husu ba governu atu tau atensaun ba problema fundamental ida ne’e.
