Estudantes Universidade Nasionál Timor Lorosa’e (UNTL) sente triste ho implementasaun prosesu aprendizajen semester badak tanbá sira ladun aprende barak kona-ba matéria no ida ne’e fó impaktu bo’ot ba sira.
Tanba ne’e Estudante husi Fakuldade Siensia Sosiais, Alarico Martins sujere ba dosente sira (permanente no kontratadu) iha UNTL atu uja didiak oportunidade ne’ebe iha hodi hanorin estudante sira ho diak.
“Nudar estudante, hau sente triste bainhira simu material ho tempu ne’ebe limitadu tebes no ami labele komprende no hatene ho diak ba material sira ne’ebe iha e hau hakarak rekomenda ba ita nia dosente sira, tenke utilize tempu ho diak, nune’e estudante sira labele lakon materia barak,” sujere Estudante Martins, foin lalais, iha Kaikoli, Dili.
Tuir nia, tinan tolu ga hat tutuir malu sira sempre atraza iha inisiu semester tanba prosesu selesaun estudantes foun tama iha UNTL tarde.
Entretantu Vise Reitór Asuntus Akadémika, Edmundo Viegas dehan, sira hasai tiha ona sirkular ida katak sei prolonga tan period ne’e ba iha loron 14 Junu 2013 mak foin finalize semester no husu ba koordenador disiplina kursu hotu atu intesifika aulas nune’e bele remata modulus ne’ebe sira prepara.
“Entermus de implementasaun fakuldade ida la hanesan, ezemplu iha Fakuladade Direitu embora estudantes sira tama atrazas maibe estudantes tuan kontinua nafatin eskola tuir kalendariu akademiku ne’ebe iha, iha Maiu sira iha disiplina balun sira ezame ona no iha fakuldade balun konserteza iha duni atrazu sentidu de implementasaun aulas tuir kalendariu akademiku ne’ebe mak universitariu sira enfrenta,” tenik Vise Reitor Viegas.
Nia mos husu ba estudantes sira labele kaer metin ba saida mak profesores hanorin ba sira, maibe nafatin iha kuriosidade hodi buka nafatin tanba sala de hanorin ne’e limitadu tebes, estudante sira tenke buka hatene liutan buat ne’ebe mak profesores hanorin iha eskola liu husi buka livrus referensias, loke internet no seluk tan.
“Hau koalia ba 2014 ne’e governu hamutuk ho UNTL hanoin hela atu buka fali mekanizmu seluk ida seidauk deside lolos maibe durante fulan walu ne’be mak sei iha restu ne’e ami hanoin atu estabelese fali mekanizmu selesaun foun di’ak liu hodi labele fó impaktu ba iha UNTL nian,” tenik Vise Reitor Viegas.
Entretantu Vise Dekanu Asuntu Akdemiku, Fakuldade Edukasaun Arte Humanidade (FEAH), Pedro Soares katak la fo impaktu ba sira nia fakuldade maske implementa semester badak tanba estudante semester tuan la’o ho prosesu normal.
“Iha semester rua normalmente fakuldade edukasaun la uja semester badak mas akontese atrazus ruma por kauza rekrutamentu estudantes foun ne’e beleprejudika,” dehan Vise Dekanu Soares.
Nia salienta katak, atrazus sira ne’e la’os kategoria ba semester badak, universidade la uja modelu sistema badak , tan ne’e ho atrazus sira ne’e husu ba estudantes sira labele sente triste maibe prepara an didiak ho material sira ne’ebe simu ona.
Atu labele atrazu tan iha future, Vise Dekanu ne’e husu ba Ministeriu Edukasaun tinan oin halo selesaun ba estudantes foun aselera, nune’e labele hamosu tan atrazus hanesan akontese agora ne’e.
