Diretor Nasional do Ensino Recorente, Filomeno Lourdes dos Reis Belo hateten, oras ne’e dadaun povu Timor-Leste maioria mak hatene ona hakerek sira nia naran.
Nia dehan, tuir estatistika ne’ebe iha desde implementa programa analfabetizasaun iha tinan 2007 to’o agora hatudu katak iha 204,000 mak bele hakerek naran no asinatura.
“13 distritus livre hotu ona, tuir estatistika numeru ne’ebe aprezenta 204 mil husi 13 distritus,” dehan Diretor Ensino Rekorente, Filomeno Lourdes dos Reis Belo, (08/05), iha Vilaverde, Dili.
Tanba ne’e nia dehan, iha tinan ne’e no tinan oin 2014 sei reforsa tan fo formasaun nafatin ba iha komunidade sira atu toman hakerek sira nia naran.
Kona ba formador sira ba programa ne’e, nia hatutan mesak timor oan e sira ne’e mak hanorin iha ida-idak nia sukus.
“Sira potensial tebe-tebes pronto atu servi sira nia rain rasik hodi hanorin buat ne’ebe sira hetan tiha ona,” tenik Diretor Belo.
Entretantu Vise Dekanu Universidade Nasional Timor-Lorosae (UNTL), Pedro Soares apresia ba programa alfabetizasaun ne’ebe mak estadu halo ona maibe tenke hare ho konsetu ba ema nia idade.
“Ema ne’ebe idade avansadu tama hotu ba alfabetizasaun ga ou ita halo alfabetizasaun ba ita nia sidadaun ne’ebe mak idade seidauk avansadu,” katak Vise Dekanu ne’e.
Maibe nia konkorda bainhira governu halo alfabetizasaun ba sira ne’ebe idade seidauk avansadu, tanba sira iha kapasidade bele tuir no akapta formasaun ne’ebe oferese ba ne’e.
Enkuantu fo formasaun ba ferik katuas ne’ebe idade liu ona, klaru sira labele akapta tanba laiha ona kapasidade atu tuir formasaun ne’e.
“Ferik katuas sira dala ruma sente katak, forma deit ona maibe sira labele halo buat ida ba nasaun, tanba idade avansadu ona,” katak Vise Dekanu Soares.
