Sekretaria Estadu ba Promosaun Igualidade preokupa tebes ho kazu feto sira ne’ebé soe nia bebe ne’ebe dadaun ne’e buras iha rai laran, tanba ne’e nia husu ba grupu feto sira atu kria no hala’o programas ba feto sira ne’e.
Sekretaria Estadu Idelta Maria Rodrigues dehan, feto maka primeiru formatura atu harii paz iha familia no sukus ida-idak tanba ne’e presiza hala’o didiak programas feto nian, nune’e bele hamenus feto soe bebe iha fatin-fatin ne’ebe akontese dadaun ne’e.
“Tanba sa maka ohin loron feto sira soe bebe arbiru de’it, ha’u espera katak feto maka primeira formatura atu harii paz, harii paz iha ita bo’ot sira nia suku, no ita bo’ot sira nia asaun inportante tebes-tebes atu hadia problema ne’e tanba la kleur ita rona feto ida soe bebe iha bairo ida, la kleur tan ita rona feto soe bebe akontese, ne’e feto mak soe la’os mane mak soe,” preokupa Sekretaria Estadu ba Promosaun Igualidade (SEPI), Idelta Maria Rodrigues, (03/05), iha Dili.
Tanba ne’e nia husu ba Gender Fokal Point SEPI nian iha distritus atu halo buat ruma ba feto sira ne’e, nune’e bele hamenus netik no buka tuir tanba saida mak feto sira nia bebe.
“Ne’e akontese iha suku-suku, ita bo’ot sira iha ne’ebá bele ajuda hodi hatene tanba saida maka problema ne’e akontese ne’e para ita hetan netik dadus ruma, ita iha informasaun ida ne’ebé atu hadia atitude ne’ebé mak mosu iha ita nia sosiedade nia le’et,” SE Rodrigues lamenta.
Entretantu Martinha dos Santos, nudar feto ida, nia triste tebes wainhira rona no haree maluk feto sira soe bebe iha dalan e kazu ne’e dalabarak liu akontese ba eskola oan sira iha SMP no SMA sira.
“Ha’u husu ba alin feto sira atu tau an didiak nudar feto, tenke hanoin imi nia future tanba ita nia nasaun ne’e presiza ema ne’ebe matenek, iha kapasidade, tanba ne’e tenke aproveita didiak durante iha banku eskola,” nia apela.
Nia mos husu ba SEPI atu kria politika ne’ebe diak ba feto sira liu-liu iha area rurais, nune’e sira mos bele dezenvolve an no fo motivasaun ba sira atu sira mos bele hetan future ne’ebe diak ba sira nia moris.
