Rede edukasaun Timor-Leste Coalition for Education sujere ba Ministeriu Edukasaun atu monta pesoal seguransa iha eskola hotu nune’e bele asegura fasilidades eskola nian ho seguru,liu-liu iha tempu kalan.
Program Manager Timor-Leste Coalition for Education, Matias do Santos hateten, durante ne’e kazu ema foti fasilidades eskola hanesan meja no kadeira inklui sunu eskola tanba laiha seguransa.
“Ami kestiona liu kona ba seguransa, hanesan foin dadaun ema sunu eskola iha Farol, ne’e tanba seguransa laiha,” preokupa Program Manager TLCE, Matias do Santos, foin lalais, iha Dili.
Program Manager ne’e kompara, iha Indonezia nia tempu eskola hotu haleu hotu ho moru no fasilidade eskola kompletu maibe hafoin ukun an eskolas hotu laiha lutu.
“Agora la’e,lutu laiha,odamatan laiha no bainhira estudante sira sai ona eskola, bibi no fahi mak tama fali iha eskola laran,” nia kritika.
Tanba ne’e rede da edukasaun ne’e suzere ba Ministeriu da Edukasaun tenki estabele lutu iha eskola hotu-hotu atu nune’e eskola bele seguru oituan.
Iha parte seluk Deputada Maria Adozinda Pires da Silva konkorda katak,eskola hotu presiza tau seguransa atu nune’e bele kontrola eskola.
“Seguransa ne’e mos tenke ser iha tanba ita hare realidade iha eskola balun sira nia aprendizajen ba to’o iha lokraik,ita hare animal mos nakonu iha eskola laran,”tenik Deputada da Silva.
Deputada ne’e hateten,animal sira balun tama iha eskola laran tanba kauza husi lutu laiha inklui mos seguransa ba eskola mos la iha.
Nudar reprezentante povu nia husu ba Ministeriu da Edukasaun katak, projetu kona ba edukasaun nian tenke pakote, bee moos, kadeiras, eletrisidade no seguransa mos tenke ser iha,”Deputada ne’e sujere.
Iha fatin hanesan Deputadu Komisaun F(Edukasaun no Saude), Eladio Faculto katak,tenke ser halo moru atu nune’e animal sira labele tama arbiru iha eskola laran.
“Agora seguransa la’os jaga fali animal, seguransa jaga eskola,” tenik Deputadu Faculto.
