Eleisaun Kamara Munisipal besik dadaun, tanba ne’e Sekretaria Estadu ba Promosaun Igualidade husu ba feto potensial Distritu Dili nian atu prepara aan hodi compete ho mane sira.
Sekretaria Estadu Idelta Maria Rodrigues dehan, partisipasaun feto iha prosesu desentralizasaun Kámara Munisipiu (KAMUS) importante,tanba ne’e prepara an fó motivasaun hodi hakbi’it no hamriik hodi koalia iha publiku bainhira sai lideransa.
“Labele iha mane deit mak tuur iha pozisaun, feto mos tenke hola parte iha pozisaun nune’e desizaun ne’ebe foti bele benefisia ba nia maluk feto sira ne’ebe la partisipa iha prosesu ne’e,” enkoraja SE Idelta Maria Rodrigues, bainhira halo enkontru ho feto potensial Distritu Dili, foin lalais, iha Salaun Administrasaun Distritu, Matadouru, Dili.
Nia esplika, politika dezentralizasaun ne’e hahu ho objetivu ida, atu hakbesik liu povu ho poder local hodi jere administrasaun no jestaun iha distritus, tanba ne’e feto sira labele sai penonton setia deit iha prosesu ne’e.
Alem de ne’e nia hatutan, desentralizasaun poder local atu halo servisu ba adminitrasaun direita hodi hadia povu nia moris, hanesan feto sai ajente, importante mak parseiro ho mane sira atu prepara dezenvolve distritu ida-idak.
Nia mos husu ba feto potensial sira atu labele tuur hein deit maibe bo’ok aan dadaun hodi identifika feto maluk sira ne’ebe matenek,nain hira mak sei konkore iha eleisaun ne’e no tenke identifika mos area saida mak feto sira iha inklui sira nia profile.
“Atu ema hatene, sira merese ga la’e, tanba ne’e feto sira tenke prepara programa no dokumentus,” katak SE Rodrigues.
Iha fatin hanesan Administradór Distritu Dili, Gaspar Soares hateten feto nia papel importante iha prosesu dezenvolvimentu tomak inklui mos prosesu dezentralizasaun poder local iha distritus.
“Ita espera katak feto sira sei mosu ho proposta ida reprezenta duni kualidade feto,” Administrador Saores esperansa.
Administrador Soares husu ba Jender Fokal Point sira atu hala’o sira nia knar ho diak liu tan, liu-liu oinsa mak fo formasaun ba feto sira hodi prepara sira ba iha eleisaun Kamara Munisipiu ne’ebe sei hala’o iha tinan 2014.
Entretantu feto potensiál Distritu Dili ne’ebe partisipa iha ekontru ne’e, Ivete Paiva Sarmento katak,sira pronto hodi compete ho mane sira iha eleisaun KAMUS tinan oin mai.
“Ha’u senti pronto ho ami-nia preparasaun ne’ebe iha, ami prepara an oinsá konkore iha eleisaun Kamara Munispiu mai ne’e, agora dadaun ami prepara ajenda no ami sei hatudu katak ami mos bele,” tenik feto potensial Distritu Dili ne’e.
Nia mos husu ba feto maluk Distritu Dili, labele tuur taka an deit maibe aprende oinsá fó suporta ba feto maluk sira iha eleisaun ne’e hodi hatudu katak tanba sa mak feto labele se karik mane bele, ho esperiénsia no kapasitasaun husi SEPI garante hodi Kompete iha KAMUS.
