Membru Parlamentu Nasional konsidera governu ladun iha planu ne’ebe diak hodi halo dezenvolvementu iha Dili laran, tanba tenke sobu jardin ne’ebe antes sira halo tiha ona ho razaun halo luan estrada.
Deputada Josefa Alvares Soares,kestiona kona ba jardin iha palasiu prezidente nia oin ne’ebe sobu tiha, se hatene ida ne’e estrada tanba saida mak uluk halo jardin iha ne’eba.
“Hau konkorda tanba atu halo alargamentu estrada, maibe kuandu hanesan ne’e, ne’e soe-soe deit orsamentu,” preokupa Deputada Josefa Maria Alvares Soares, foin lalais, iha PN.
Deputada Soares esperansa katak obra ne’e halo ho diak no iha nia kualidade tanba obra barak maka halo tiha depois la to’o tinan at fila fali.
Entretantu Engeneering Estrada, Jose Agusto hateten jardin ne’e tenke sobu tanba fatin ne’e fasparte ba estrada.
“Sobu tanba atu halo alargamentu ba estrada, fatin ne’e mos tama iha estrada nia bagian,” tenik Engeneering Estrada Ministeriu Obras Publiku, Jose Agusto.
Tanba ne’e nia dehan, sira sei la halo tan jardin foun, tanba estrada ne’e nia mediu tenke metro 21.
Tuir nia, antes sobu jardin ne’e husi parte Ministeriu Obras Publik hatama uluk karta ba Gabinete Prezidente no sira konkorda atu sobu.
