Tuir Doutor Jorge Mario Luna katak, inan ne’ebe durante isin rua fuma sigaru no horon sigaru suar be-beik sei fo impaktu ba bebe nia saude.
Nia esplika, sigaru iha zat nikotin ne’ebe bele estraga ema nia saude, liu-liu ba bebe ne’ebe sei iha inan nia isin.
“Bebe bele moris premature no bebe nia todan la normal,” dehan Doutor Jorge Mario Luna, foin lalais, iha Dili.
Tanba ne’e nia husu ba governu atu kria regulamentu ida hodi bandu ema fuma iha fatin publiku ne’ebe inan isin rua sira asesu ba.
Entretantu Ministru Saude, Sergio Lobo rekonese katak sigaru suar fo risku ba bebe nia saude tanba ne’e ministeriu liu husi Diresaun Promosaun Saude desimina ona informasaun ba komunidade sira kona ba impaktu sigaru ba ema nia saude.
“Ita sei hasai regulamentu ida hodi regula labele fuma iha fatin publiku tanba perigozu ba ema nia saude,” Ministru Lobo promete.
Ministru ne’ebe nudar mos mediku ida, nia dehan ba inan isin rua ne’ebe gosta fuma sigaru sei fo impaktu ba bebe e iha posibilidade bebe bele hetan moras asma.
