Governu Timor-Leste inaugura ona iha Dili Loja-Unika SERVE (Serviços de Registo e Verificação Empresarial) atu hafasil emprezarius nasional no internasional hahu sira nia aktividade negosiu ho lais liu no fásil liu.
“Ami fiar Timor-Leste presiza setor privadu enérjiku no ativu ida. Ne’e abertura preliminar atu permiti empreza sira atu rejista no renova, dehan Vice Ministra das Finanças, Santina Cardoso, iha abertura SERVE iha loron 3 Juñu, 2013, iha Dili.
“Importante tebe-tebes atu empreza hotu-hotu – mikro, kik, médiu no bot – mai rejista iha SERVE; ho forma ida ne’e deit mak Governu bele hatene sa ida mak nia presiza atu halo hodi reforsa setor privadu.”
Uluk emprezariu sira tenki ba vizita fatin ketak tolu iha ministérius governu nian dala barak to’o 17 vezes durante loron 94 ne’ebe sira presiza atu kompleta sira-nia dokumentasaun rejistu.
Ho Sentru Atendimentu Integradu SERVE empreza foun ida presiza loron lima deit atu kompleta prosesu inisializasaun no atu bele hahú operasaun komersial.
Estabelesimentu Sentru Atendimentu Integradu SERVE signifika emprezáriu sira bele ba fatin sentral ida no hetan sira-nia rejistru empreza, husu lisensa komersial no hetan sira-nia Númeru Identifikasaun Taxa (TIN).
“Desde hau-nia nomeasaun nudar CEO SERVE nian, hau nia ekipa no hau serbisu hamutuk ho IFC [International Finance Corporation] atu garante katak sistema hotu-hotu funsiona diak no garante katak emprezáriu hotu-hotu mai rejista sira-nia empreza no gosta experiénsia ne’e. SERVE prontu atu suporta empreza sira,” dehan Ofisial Xefe Ezekutivu (CEO) foun SERVE nian, Florencio Sanches.
SERVE nia fatin temporariu loke ba publiku foin lalais (3/6) iha Obrigado Barracks 2, iha Dili, no SERVE sei muda ba ni-nia fatin permanente iha Colmera iha tinan 2013 nia laran.
Orasne’e Timor-Leste klasifikadu iha pozisaun 147 husi nasaun 185 iha termus hahú negósiu tuir relatóriu anual Doing Business 2013. Ne’e melloria ida husi klasifikasaun 2012 nian iha pozisaun 157 husi nasaun 183 no reflete reformas governu nian ba rejistru negósiu no sistema lisensiamentu iha nasaun ne’e desde 2011.
