Membru Parlamentu Nasional preokupa no lamenta tanba numeru ema laiha servisu (dezempregu) iha rai laran kontinua sa’e husi tinan ba tinan.
Deputada Maria Angelica Rangel hateten, durante ne’e ema barak, liu-liu sira ne’ebe hasai estudu iha universidade sira iha Dili laran no iha rai liur, hafoin remata sira laiha servisu.
“Iha ministeriu balun uja deit ema husi liur sai sira nia sekretaris, ida ne’e sai perguntas ba ita, ne’e dehan Timor oan labele halo,” preokupa Deputada Maria Angelica Rangel, foin lalais, iha PN.
Entretantu Sekretariu Estadu Politika Formasaun Profesional no Empregu (SEPFOPE),Ilidio Ximenes da Costa katak, dezempregu la’os Timor deit mak iha maibe kuaze iha nasaun hotu.
Nia dehan, iha V governu iha politika ida, hodi fo formasaun ba joventude sira, ho nune’e mak bele redus numeru dezempregu ne’ebe kada tinan sempre sa’e.
“Setor privadu sira mos importante teb-tebes para atu kopera, para atu labele hein deit projetu governu nian maibe sira mos hetan projetu kria fali programa ruma atu bele akumula ema sira ne’ebe dezempregu ne’e,” SE da Costa katak.
Alem de ne’e, nia afirma,governu mos iha auto empregu ne’ebe mak bele mos ajuda joventude, komunidade en jeral ne’ebe seidauk hetan servisu.
“Programa empregu rurais katak projetu tres dolares ne’ebe mak loke bele fo servisu temporaria ba ita nia inan aman sira iha area remotas, ho objetivu katak,involvimentu komunidade nian importante teb-tebes ba iha dezenvolvimentu iha pais ne’e,” tenik SE da Costa.
Nia hatutan, dadus kona ba numeru dezempregu ladun fiksu tanba ne’e iha tinan ida ne’e sira sei hadia no kria sistema baze de dadus ida ne’ebe ke diak.
“Ita presiza hadia sistema ne’e para ita bele halo sensus ida ne’ebe klaru,” katak SE da Costa.
