Primeira Dama, Isabel Ferreira enkoraja Pesoal Saude sira iha Ospital Nasional Guido Valadares atu labele tauk hodi koalia sai buat ne’ebe loos, tanba sira mak hatene liu area saude duke politika.
Nia dehan, Pesoal Saude (PS)sira labele hein deit desizaun husi politikus sira hodi implementa tuir, tenke intervene bainhira mosu problema iha administrasaun no politika governu nian ba sistema saude ne’ebe la kondis ho situasaun real Timor –Leste nian.
“Labele tauk ho ameasas sira,” enkoraja Primeira Dama, Isabel Ferreira, bainhira halo enkontru ho Pesoal Saude sira, iha HNGV, Bidau, Dili.
Primeira Dama hatutan, durante ne’e Pesoal Saude sira la brani atu koalia sai lia loos.
“Ita la brani hateten la diak no la los ba ita nia politiku sira, at liu mak ita gosta halo sira kontente, ita subar buat ne’ebe at iha ita nia servisu rasik, pior liu buat ne’ebe ita halo sala ita taka sala ne’e fo ameasa ba ema seluk atu hatete buat ne’ebe ita halo sala,”kritika Primeira Dama da RDTL ne’e.
Nia afirma, problema ne’e sai preokupasaun ema hotu nian inklui mos Primeiru Ministru, nia sentre triste bainhira povu kontinua halerik ba atendimentu saude no falta aimoruk.
Governu halo ona nia dever hofi fo regime espesial ba Pesoal Saude sira maibe povu kontinua kestiona atendimentu saude ne’ebe la diak husi servisu saude nain sira.
Iha parte seluk, Reprezentante Medikus husi Australia, Doutor Eric Brande ne’ebe durante ne’e hala’o knar iha HNGV, konkorda ho Primeira Dama no ema hotu tenke ho lian ida deit hodi rekonese katak Ospital Nasional hasoru duni problema.
“La’os ida –idak mai ho interese pesoal,” Doutor Brande konkorda.
Tuir nia, ho nune’e mak bele aumenta kualidade servisu Pesoal Saude sira. “Hau hanoin katak iha buat rua : ida mak ema hotu tenke konkorda katak iha problema, segundu ita hotu tenke muda ita nia atitude katak fo atendimentu ba pasiente hanesan mos familia rasik,” tenik Doutor husi Australia ne’e.
