Tuir Sekretariu Estadu Komunikasaun Sosial (SEKOMS), Nelio Isaac Sarmento katak iha programa prioridade barak mak sei hala’o iha tinan ida ne’e.
“Tinan ne’e fokus liu ba projetus ida maka kona ba sosa jornais atu distribui ba distritus sira,sukus, área rurais sira, e projetu ida maka halo instala foun ba radio komunidade sira inklui mos radio UNTL, akizasaun ekipamentus, depois programa seluk-seluk maka formasaun no mos esbosu Lei
Komunikasaun Sosiál,” dehan Sekretariu Estadu Komunikasaun Sosial, Nelio Isaac Sarmento, foin lalais, iha Dili.
Tanba ne’e nia dehan, programa balun seidauk bele realiza iha tinan ida ne’e tanba orsamentu ne’ebe iha la sufsiente e nudar membru governu foun nia sei la’o ho osan ne’ebe mak iha.
“Nudar membru foun ha’u lakohi mehi bo’ot, di’ak liu ita la’o ho ki’ik oan hanesan ne’e depois ita hare’e to’ok nia rezultadu no tinan oin mai maka ita haree tok nesesidade balun ne’ebé maka ita sei presiza,” tenik SE Sarmento.
Entretantu membru Komisaun E (infra-estrutura, transporte no telekomunikasaun), Deputadu Inacio Moreira dehan tuir nia hatene SEKOMS iha ona planu prioridade atu fo formasaun ba jornalista sira iha rai laran.
“Jere osan ne’e didiak importante liu maka, jornalista hotu-hotu ne’ebé iha ninia talenta hakarak sai jornalista ne’ebé professional bele kapasita sira ho osan ne’ebe iha, atu nune’e bele sai matenek liu tan hodi hala’o ninia knar jornalista ho kualidade,” sujere Deputadu Moreira.
