Domingas Soares, Koordenadora Uma Mahon Casa Vida hateten labarik vitima ho idade 14-16 anos ne’ebe hela iha uma mahon ne’e maioria ho kazu violasaun seksual, insestu, violensia domestika no abandonadu.
Nia sublinha, husi labarik 29 ne’e nain neen reintegra ona ba familia, kazu hat tama ona iha Ministerio Publiku hein notifikasaun no kazu rua seluk familia halo mediasaun tanba hein prosesu kleur liu sira tenke integra ba familia nune’e uma mahon bele hare fali ba kazu urgensia seluk nain 23 mak sei hela iha uma mahon hein sira nia prosesu.
“Iha fulan Maio, dia 16 labarik vitima violasaun seksual ida sei julga iha tribunal,” dehan Koordenadora Uma Mahon Casa Vida, Domingas Soares, (04/03), iha Bidau Akadiruhun, Dili.
Tuir estatistika ne’ebe iha hahu husi tinan 2008-2013 fulan Fevereiru Casa Vida registu kazu violasaun hasoru labarik hamutuk 125. Husi numeru ne’e labarik (vitima) nain 70 mak reintegra ona ba familia, lima hetan ona desizaun husi tribunal ho pena prizaun tinan 15, 10,5 ba autor sira no nain 55 mak sei hela iha uma mahon hodi hein prosesu iha tribunal.
Entretantu Deputada Josefa Alvares Soares konsidera prosesu julgamentu ba kazu violasaun hasoru labarik ne’e la’o neineik liu.
Tanba tuir nia, Timor-Leste seidauk iha tribunal dos menores atu tau matan espesifiku liu ba iha kazu violasaun hasoru labarik.
“Hau hanoin ida ne’e mak tenke iha atu responde lalais ba labarik sira nia situasaun,” sujere Deputada Soares.
