Tuir Sekretariu Estadu Obras Publiku, Luis Vas Rodrigues katak, estradane’esei halo ho espesifikasaun Internasional ho standar internasional mos.
“Nia modelu sei luan liu tan no nia estrutura sei forti liu tan, ne’e be estrada ne’e ita garantia katak iha duni kualidade,” dehan Sekretariu Estadu, Luis Vas Rodrigues, iha PN, (06/02).
Nia dehan, orsamentu ne’ebe maka sei aloka ba planu ne’e uja osan imprestimu ki’ik ida husi Governu Japaun liu husi JICA, ne’ebe maka governu rua ne’e asina ona akordu iha tinan kotuk. Projeitu ne’e agora dadaun iha hela prosesu aprovizionamentu nia laran.
Prosesu konstrusaun, nia hatutan iha tinan ida ne’e komesa servisu ona, atu nune’e iha tinan lima nia laran bele remata antes mandatu governu ne’e hotu.
“Ita hahu kedas preparasaun iha tinan ne’e, tanba ho orsamentu ne’ebe maka aloka agora ne’e hamutuk tokon $1.160.000 ne’e para obras public hahu halo servisu,” tenik SE Obras Publiku ne’e.
Entretantu Deputadu Inacio Moreira husu atu uja didiak osan ne’ebe iha nune’e obra hirak ne’ebe bele remata ho kualidade diak.
“Ita hein para ita bele hare osan ne’e sira implementa diak galae, tanba osan ne’e impresta,” dehan Deputadu Moreira.
Tanba tui nia, iha esperiensia barak mak hatudu katak wainhira hetan apoiu husi doadores sira atu halo estrada, halo duni maibe estrada sira ne’e la to’o tinan at fali ona.
