Organizasaun Non Governmental Care Timor-Leste kria aktividade ekstra kurikuler ba labarik feto sira iha eskola, ho objetivu atu enkoraja labarik feto sira kontinua sira nia estudu to’o remata.
Tuir Program Manager, Teodosio Batista Ximenes katak projeitu hanaran Young Women Young Nation ne’e hala’o desde 2009, hahu ho peskiza iha Distritu Bononaro, Covalima no Distritu Liquisa hatudu katak numeru labarik feto sai husi eskola as tebes iha distritu hirak ne’e.
“Husi 2009 to’o agora ami identifika katak iha redusaun maka’as tebes iha eskola ne’ebe ami hala’o aktividade ba (eskola pilotu) labarik nain sia deit mak sai eskola kompara ho eskola seluk labarik kuaze 30 e tal mak sai eskola,” dehan Program Manager, Teodosio Batista Ximenes, (07/02), iha nia knar fatin Bairo-Pite, Dili.
Aktividade ekstra kurikuler hirak mak hanesan arte zenatu, suku, desportu, kanta, sertame, lee puizia no seluk tan, sira hala’o iha distritu rua hanesan Distritu Bononaro iha eskola lima no Liquisa iha eskola hat.
“Tanba distritu rua ne’e mak labarik feto sai eskola barak liu duke Covalima, e aktividade ne’e ho objetivu atu redus no prevene labarik feto sira sai husi eskola,” dehan Program Manager Care TL ne’e.
Alem de ne’e tuir nia, sira mos fo treinamentu ba inan aman sira tanba papel inan aman importante tebes hodi enkoraja labarik feto sira atu ba eskola no koalia ho labarik mane sira labele bo’ok labarik feto sira nune’e sira labele tauk ba eskola.
Iha parte seluk, Membru Komisaun F Parlamentar, Deputada Ilda Maria da Conçeicão apresia ho aktividade ne’ebe organizasaun sira kria ba labarik sira importante mos Ministerio Edukasaun tenke koalia ho asosiasaun dos pais e profesores sira fo atensaun ba oan sira tanba dala barak labarik sai eskola impaktu husi kaben sedu, ekonomia uma laran fraku entaun inan aman fo prioridade liu ba oan mane duke oan feto.
“Primeiru ita tenke koalia ho inan aman sira liu-liu iha reuniaun inan aman nian tenke fo hanoin malu atu kontinua fo atensaun ba oan sira bainhira sei iha kadeira eskola nian tanba iha lei ensino baziku obrigatoriu inan aman sira tenke husik oan sira ba eskola ho idade ne’ebe eskola nian,” dehan Deputada da Conceicao.
