“Kazu invenenadu ne’e urgente tenke halo teste kedas la’os liu tiha loron ida ka fulan ida mak foti sampel, ne’e lalos hanesan kazu Lospalos nian ami atu tun lalais mos labele tanba ami laiha transporte,” preokupa Diretor Toxicologia, Pedro Almeida, (07/01), iha Bidau, Dili.
Iha parte seluk Diretora Jeral Loratorium Nasional, Doutora Maria Santina de Jesus Gomes rekonese duni katak laiha duni transporte atu halo sirkulasaun ba servisu ne’ebe presiza kontrola hanesan kualidade aihan, produsaun bee mos ne’ebe eziste iha rai laran tanba transporte hamutuk hat ne’ebe laboratorium iha rua agora dadaun iha kondisaun at.
“Ami iha kareta hat deit rua ho kondisaun at durante ne’e ami uza lesuk kareta ne’ebe lori diretora jeral hala’o aktividade, ami hein katak tinan ida ne’e ministeriu saúde bele fo atensaun mos tanba difikulta servisu laboratorium nian,” dehan Diretor Jeral LabNas ne’e.
Tuir nia, LabNas presiza kareta neen hodi fasilita servisu staf laboratorium nian e tinan ida ne’e sira propoin orsamentu ho montante sinku milioens, dois milioens atu kompras ba ekipamentus reajente hodi kontrola aihan inklui transporte nian.
Entretantu membru Komisaun F Parlamentar, Deputada Ilda Maria da Conçeicão dehan, presiza duni tau atensaun ba difikuldade ne’ebe LabNas hasoru kona ba fasilidade no transporte.
“Ami sei bbolu atensaun ba Ministeriu atu hare problemas ne’ebe Laboratorium hasoru hanesan laiha ekipamentus no reajente maske rekursu iha ona ita bele tau osan hodi kompra sasan sira ne’e halo analiza iha rai laran duke haruka ba rai liur gasta osan barak dala ruma mos la to’o iha fatin nia rezultadu mos laiha,” dehan Deputada ne’e.
