“Sirkulasaun sidadaun ninian iha teritorio laran sei iha tendensia ameasa, iha nivel area rurais dala ruma iha insidente balun ita nia polisia la konsege halo atuasaun ne’ebe diak,” hateten Koordenador Peskiza FM, Joao Almeida Fernandes, foin lalais iha Balide, Dili.
Kordenador ne’e dehan, ida ne’e akontese tanba sei iha limitasaun ba rekursu umanu iha instituisaun Polisia Nasional Timor-Leste (PNTL), e espera katak iha tinan 2013 bele iha mudansa.
“Hanesan tau fasilidade ne’ebe sufsiente no aumenta rekursu umanu ne’ebe barak atu nune’e bele atende kazu sira ne’ebe maka iha ho diak no fo siguransa nebe maka diak ba komunidade hotu,” Koordenador Peskiza ne’e esperansa.
Hatan ba kestaun ne’e Segundu Komandante PNTL, Komisariu Afonso de Jesus katak, peskiza hirak ne’e dalaruma balun laiha realidade.
“Hau fiar katak iha komando distrital idak-idak liu-liu ba sub-estasaun sira ne’e halo patruliamentu iha fatin sira ne’ebe maka izoladu, la’os loron-loron maibe kadabes fulan ida rua sira ba hare, nune’e komunidade nia asesu ba seguransa ne’e iha,” dehan Komisariu de Jesus.
Komisariu ne’e rekonese katak, sira menus duni rekursu umanu tanba iha atuasaun balun seidauk hala’o ho efetivu. “Iha estasaun balun rekursu ne’e limitadu liu tanba balun iha nain sanulu deit no balun iha nain sia deit, e ida ne’e hanesan dezafiu ida,” tenik Komisariu ne’e.
Tanba ne’e iha tinan 2013 sira sei esforsu aan hodi aumenta rekursu umanu nune’e bele responde situasaun hirak ne’ebe mosu iha rai laran.
“Fiar katak iha future mai ita bele reforsa tan polisia iha sub-estasaun sira suku sira atu nune’e bele kobre fatin sira ne’ebe maka izoladu, tuir planu membru sira ne’ebe maka agora dadaun tuir hela formasaun ne’e sei tau balun iha distritu- distritu,” Komisariu ne’e katak.
