“Mas hau hanoin ita mos tenke proativu atu hare no buka iha ministeriu ne’ebe loke vagas, se laiha ita la’os hein deit sai funsionariu publiku maibe bele forma grupu atu kria kampu servisu bazeia ba area espesifiku ne’ebe hetan hodi hasae kapasidade joven sira seluk nian,” dehan Ministru Edukasaun, Bendito Freitas, foin lalais, iha serimonia lansamentu bolsa Estudu Dezenvolvementu Australia (ADS) no NDZS ba 2014 nian, iha Garden Beach Hotel, Pantai Kelapa, Dili.
Tanba ne’e tuir nia, iha V Governu Konstitusional iha ona planu atu loke kampu servisu hanesan estabelesementu Kamara Munisipiu no projetu Mega Supply Base iha Suai no seluk tan, importante mak joventude sira tenke preparadu atu hala’o servisu sira ne’e.
Iha parte seluk Manager Bolsu Estudu ADS/NZDS, Maria Braz hateten hahu husi inisiu tinan 2000 to’o agora Timor oan kuaze 400 resin mak remata ona nia estudu iha Nova Zelandia no Australia maibe balun seidauk hetan servisu.
“Sira ne’ebe seidauk servisu, ami iha programa estajiu iha instituisaun governu durante tinan ida nia laran, atu servisu depende ba bolseiru sira,” dehan Manager Bolsu Estudu ne’e.
Bolseirus hirak ne’ebe remata ona sira nia estudu hanesan iha area Saúde, Agrikultura, Ekonomia no seluk tan. Enkuantu ba tinan 2014 governu rua kontinua fo oportunidade ba estudante hamutuk nain 55 kompostu husi Australia (ADS) nain 40 no Nova Zelandia (NZDS) nain 15.
Entretantu bazea ba dadus sensus ne’ebe iha Sekretario Estadu Politika Promosaun Profesional e Empregu (SEPFOPE) iha hatudu katak iha ema nain 9.000 mak sai dezempregu iha rai laran inklui dezempregu intelektual.
