“Ami labele halo ida ne’e tanba kimiku presiza ekipamentus ne’ebe karun hanesan makina reajente no makina rapidu teste, maibe analiza aihan hodi hatene bacteria ne’ebe halo ema lanu ne’e ami bele halo,” dehan Diretora Laboratorium Nasional, Doutora Maria Santina de Jesus Gomes,(07/01), iha Bidau Toko Baru, Dili.
Maske nune’e Diretora ne’e dehan, sira sei esforsu hodi haruka sampel veneno ne’e ba iha Indonezia hodi halo teste tanba sira iha fasilidade kompletu.
Kazu ne’e rasik akontese iha 24 Outubru 2012, iha ne’ebe estudante nain 63 invenenadu hafoin konsumu aihan husi merenda eskolar iha sira nia eskola, husi akontesementu ne’e estudante 63 ne’e tenke baixa iha ospital Lospalos.
Kona ba falta fasilidades ne’e parte Laboratorium Nasional dalabarak ona hatama proposta ba iha Ministeriu Saude maibe to’o agora laiha rezultadu.
Iha parte seluk membru Komisaun F Parlamentar, Deputadu Eladio Faculto husu ba Laboratorium Nasional atu esforsu an buka alternative seluk nune’e sampel veneno ne’e bele halo teste no hetan rezultadu tanba suspeitu sei livre hela.
“Ami sei koalia ho ministru saude atu tau atensaun ba kazu hanesan ne’e, labele husik deit ema seluk sai vitima nafatin,” dehan Deputadu ne’e.
Kazu hanesan mos akontese iha Distritu Baucau, iha festa kazamentu ida iha ne’ebe iha ema nian kuaze 50 resin mak invenenadu, iha dia 29 Dezembru tinan kotuk ne’e no mos iha Distritu Oe-Cusse ema ida mate.
