Grupu Mulher Parlamentar Timor-Leste (GMPTL) sei fo kapasitasaun ba nia membrus sira kona ba Orsamentu Sensivel ba Jeneru (OSJ) antes tama ba iha diskusaun ba Orsamentu Jeral du Estadu (OJE) ba ano fiskal 2013 nian, nune’e sira bele iha konesementu bainhira halo debate no aprova osan ba asuntu ne’e.
“Ita hotu hatene la kleur tan orsamentu jeral foun tama ona mai iha Parlamentu Nasional, feto maluk inklui mos mane sira tenke hatene analiza orsamentu sensivel ba jeneru signifika katak fo benefisiu ba mane no feto sira hotu osan ne’ebe parlamentu aprova,” hateten Prezidente GMPTL, Deputada Josefa Alvares Soares, iha Parlamentu Nasional.
Tuir nia, iha Deputadus balun seidauk iha konesementu oinsa mak atu halo analiza ba OJE, liu-liu ba OSJ oinsa mak bele fo benefisiu ba feto no mane sira tanba ne’e presiza duni kapasita sira.
Kapasitasaun ne’e la’os deit analiza OSJ, maibe mos kona ba lejislasaun ninian e kapasitasaun ida ne’e sai mos hanesan programa prioridade ne’ebe tau iha Planu Estratejiku GMPTL nian.
Iha parte seluk Deputada Albina Marçal Freitas, rekonese katak nudar membru foun iha Parlamentu, sira presiza duni kapasitasaun ne’ebe masimu atu hasae sira nia konesementu kona ba analisa OJE no lejislasaun nian.
“Ami nia planu estratejiku ne’e iha mos programa prioridade lubuk ida maibe programa ne’ebe atu implementa uluk mak kapasitasaun iha area lejislasoens ba ami deputada sira, oinsa sira bele hatama proposta lei ne’ebe espesifiku atu proteze no promove feto sira nia direitu inklui mos analiza orsamentu sensivel ba jeneru,” dehan Deputada Freitas.*
