“Farda ne’e importante tanba hatudu ema nia personalidade nudar polisia ou military, Governu tenke esforsu wainhira tinan ida ne’e la hetan, entaun tinan oin mai ne’e tenke iha ona, tanba ita labele husik deit buat sira hanesan ne’e la’o kleur liu,” dehan Vise Prezidente Komisaun B Parlamentar, Deputadu Duarte Nunes, iha PN.
Tuir nia, lolos farda PNTL nian kada tinan rua tenke troka, atu nune’e sira labele uza deit faru ida to’o nakles.
“Ita hare no rona kona ba membru sira nia reklamasaun kona ba sira uza farda to’o agora nafatin hela deit, ne’e ita tenke konsidera duni tanba realidade hatudu duni, lolos ne’e farda ne’e kada tinan rua-rua ne’e tenke fahe fali foun ona,” dehan Deputadu Nunes.
Iha lidun seluk Xefe Sentru Formasaun Akademia Polisia (AKPOL), Superintemdente Carlos Jeronimo hateten, agora dadaun iha hela fase prosesu tanba ne’e husu para atu hein oituan.
“Buat hotu-hotu sei la’o ho prosesu, ami hato’o ona buat ne’e ba iha leten, no hein deit sei rezolve kestaun ne’e,” dehan Xefe AKPOL Jeronimo.
Tuir nia, PNTL sei la husik hanesan ne’e deit tanba Polisia Foun sira ne’e mos sira nia estajiu atu besik remata ona.
“Ne’e duni hakarak ka lakoi sei responsabiliza no prosesu maka la’o hanesan ne’e duni no hein deit, ami mos sei rekruta tan polisia foun tan ne’e, sei iha esforsu par bele koresponde ba situsaun ne’e oinsa para sira ne’ebe maka iha ne’e bele hetan ona farda,” Nia tenik.
