“Prosesu operasaun tenke hala’o duni tanba iha agenda, maibe seidauk iha informasaun husi Ministeriu Comersiu no Diresaun Nasional Transporte e Terestres, tanba ami halo linha servisu ho sira,” hateten Komandante Polisia Tranzitu, Superintendente Antonio Soares, iha Kaikoli, Dili.
Tuir nia, fatin hirak ne’ebe durante ne’e komunidade sira uza hodi fa’an sira nia motor no kareta mak hanesan iha Merkadu Maloa Bairo-Pite, iha Hali Laran besik postu tranzitu nian e hafoin polisia halo detekta motor hirak ne’e laiha dokumentus.
Tanba ne’e parte Polisia Tranzitu sei koko atu koalia tan ho Ministeriu relevante atu nune’e bele aselera programa ne’e.
“Ami tenta to’ok, atu nune’e iha fulan Outubru ne’e bele hala’o ona operasaun, hodi kontrola ema sira ne’ebe maka fa’an kareta no motor la tuir prosedimentu, tanba ne’e maka ami halo linha servisu ho komersiu no dirasaun trestres tanba sira maka hatene katak ema ne’e ema ne’e rejistu ga lae,” dehan Komandante Polisia Tranzitu ne’e.
Entretantu Depuatadu Mateus de Jesus dehan, ne’e programa ne’ebe maka diak, nune’e bele prevene ema fa’an motor ilegal sira.
“Kestaun sira hanesan ne’e mos atu prevene motor no kareta sira ne’ebe maka laiha dokumentus labele barak liu iha ita nia rain ida ne’e,” dehan Deputadu de Jesus.
Kona ba MCIA ne’ebe seidauk fo karta lisensa ba PNT sira atu halo operasaun atividade ilega ne’e, tuir nia, karik tanba sira sei prepara dadus ne’ebe maka kompletu atu bele identifika katak motor sira ne’e hetan rejistu ga lae.
“Atu nune’e polisia mos la’o tuir dadus ne’e hodi labele salah, tanba ida ne’e mos fas parte iha profesionalismu polisia nian, wainhira ba kaer mak salah ne’e ladun diak,” dehan Deputadu ne’e.
