“Hau mesak dala ruma pasiente sofre nehan mai to’o 20 ba leten ne’e hau tenke haruka fila tanba material ida deit, entaun uza hotu tiha hau tenke fase, hein fali aban no se hau lisensa klinika ne’e taka hau tama fali mak foin loke fali,” dehan Emfermeiru Dentista SSC, Vicente dos Santos, iha Comoro, Dili.
Enfermeiru ne’e dehan, nia parte hatama ona proposta ba Ministerio Saúde atu rekruta Emfermeiru no Medikus nehan nian ba iha klinika nee maibe to’o agora laiha rezultadu.
Nia hatutan, karik tanba rekursu ba area dentista mak minimu, tanba agora dadaun total medikus dentista hamutuk nain hitu no emfermeirus nain 32, tanba ne’e iha sentru saúde balun laiha.
Enkuantu pasiente nehan ne’ebe durante ne’e halo konsulta iha klinika ne’e barak liu mak labarik no adultu sira tanba sira mama malus, fuma sigaru, hemu tua manas, no labarik tanba sira han coklate, liu-liu han hahan midar sir abele estraga nehan.
“Ho ida ne’e importante tebes halo konsulta lalais, labele hein to’o mosu tumor ou kanker, tanba moras ne’e oho ema lais liu duke moras seluk,” Enfermeiru ne’e apela.
Enfermeiru ne’e informa, kada fulan ida iha pasiente hamutuk 200 resin mak halo konsulta ba nehan hanesan solda, fokit e iha balun mos hakarak fase maibe labele tanba laiha fasilidade atu fase.
Tanba ne’e husu ba komunidade sira atu kuidadu sira nia nehan, tanba aimoruk ba nehan difisil no karun hanesan aimoruk oho ular nian cariestop, masa ki’ik ida ho presu $100.
Entretantu Xefe Departementu Rejistu Dezenvolvementu Profesional Saúde, Duarte Marcal de Araujo hateten Ministeriu Saúde halo ona esforsu no fo ona bolsu estudu ba estudantes sira atu hasa’e konesementu iha area dentista nian iha Indonezia iha Kediri.
“Agora dadaun ami halo surat haruka ba Prezidente Fundu Dezenvolvementu capital umanu bele fo osan ruma husi ministeriu sira ne’ebe ladun ezekuta osan ba ministerio saúde ami bele rekruta tan ema atus ida ba hala’o estudu iha Indonezia 20 ba medikus dentist no diploma tolu ba dentista inklui mos analista,” dehan Xefe Araujo.
