Sekretariu EStadu Joventude no Desportu (SEJD) promete sei fo bolsu estudu ba membru Parlamentu Foinsa’e (PF) tuan ne’ebe iha kualidade, hodi kontinua sira nia estudus iha universidade, nune’e sira bele dezenvolve konesementu ne’ebe iha no sai lideransa ne’ebe diak iha future.
“Ita sei promove sira,ho orsamentu 2013 nian sira ne’ebe iha kualidade diak, ami sei fo bolsu estudu ba sira atu kontinua sira nia estudu, tanba hau hare sira iha kualidade lideransa nian ne’ebe komesa mosu, se lae investimentu ne’e kotu iha dala klaran, ita la hatene sira atu ba ne’ebe,” dehan SE Miguel Manetelo, foin lalais iha Parlamentu Nasional.
Enkuantu ba sira ne’ebe la hetan oportunidade, tuir Sekretariu Estadu, SEDJ nafatin enkoraja sira atu estuda maka’as hodi bele hetan mos oportunidade hanesan husi governu ou nasaun seluk ne’ebe agora dadaun fo oportunidade makas ba Timor oan atu halo estudu iha sira nia rai.
Total membru Parlamentu Foinsa’e hamutuk 130 pesoas no sira nia mandatu durante tinan rua-rua deit e membru tuan la kleur tan sira nia mandatu remata, tanba SEJD sei halo rekrutamentu ba membru PF foun ba period 2013 to’o 2015.
Iha lidun seluk Prezidente Conselhu Nasional Joventude Timor-Leste, Leovigildo Hornai hateten ba membru PF ne’ebe iha kualidade diak, CNJTL sei prepara sira sai lideransa ne’ebe diak hodi kontinua fo formasaun ba sira.
“Hau sei koalia ho sira atu preense iha divizaun lima ne’ebe CNJTL estabelese hanesan divizaun Monitorizasaun ba atividade Parlamentu Nasional nian, divizaun Anti Korupsaun no Boa Governasaun, divizaun Advokasia, Kapasitasaun no Peskiza nian, nune’e sira bele dezenvolve formasaun sira ne’e atu labele lakon deit,” dehan Prezidente CNJTL ne’e.
Kona ba membru PF kualidade ne’ebe hetan bolsu estudu, tuir nia, CNJTL nafatin halo monitorizasaun, nune’e bainhira iha eventu importante ruma, sira bele involve aan.
