“Ami nia servisu liga liu ba asuntus rai liur nian maibe funsionariu sira la domina lingua Inglesh entaun ami iha ideas no ami kontaktu ona agency ida husi governu India, sira fornese kursu Inglesh no IT ba ami nia funsionariu sira tanba ne’e tinan ida ne’e ami sei haruka funsionariu nain lima atu ba tuir kursu ne’e hodi bele prepara ba futuru sira bele tuir enkontru internasional ruma kona ba ambiental,” dehan Diretor Nasional Asuntu relasaun Internasional, Agusto Pinto, foin lalais iha Sentru Convesaun Dili.
Tuir nia, durante ne’e governu gasta orsamentu bar-barak iha setor oioin maibe dezenvolvimemtu la’o iha fatin tanba dala barak nomeasaun no rekrutamentu ba funsionariu la tuir background edukasaun ne’ebe iha
“Kontrariu fali ho skill ne’ebe sira iha no barak la hatene lingua Inglesh entaun difisil atu lori programa ba oin,” Diretor ne’e tenik.
Entretantu Reprezentante Pontu Fokal Distrital Ermera, Edelmiro Jose de Deus konkorda ho planu ne’ebe SEMA liu husi diresaun asuntu internasional atu hasae kapasitasaun ba funsionario sira iha rai liur no rai laran maibe triste oportunidade sira ne’e fo deit iha nasional.
“Ami ne’ebe iha distrital la iha konesementu kona ba lingua, ami mak marka pasu iha fatin deit maske ita rona governu kada tinan aprova osan atu fo kapasitasaun hanesan ba funsionario sira,” Pontu Fokal ne’e kritika.
