“Maske hau nia mandatu hotu ona maibe hau sei esforsu atu fo apoiu nafatin ba prioridade ne’ebe ospital nasional presiza atu governu Korea apoiu tanba iha ekipa ida mai husi Korea ne’ebe hala’o peskiza iha HNGV iha fulan hirak liu ba, sira sei mai fali atu apoiu HNGV hodi hare prioridade ne’ebe iha,” dehan Embaixador Korea iha Timor-Leste, Seo Kyeong Suk, (07/09), iha Bidau Toko Baru, Dili.
Embaixador ne’e dehan, durante iha nia mandatu iha apoiu barak mak nia apoia ona ba governu TL, mak hanesan konstrui ona fabrika bee moos nian iha Metinaro, estabelese senrtu imprime iha Comoro hodi produs livrus ba mestre no alunus sira inklui entrega stok aimoruk ba HNGV no apoiu seluk tan.
Embaixador ne’e promote, maske nia mandatu remata iha fulan ida ne’e maibe embaixador foun kontinua fo apoiu ba HNGV liu-liu iha area kapasitasaun no fasilidade hanesan ekipamentus medikus inklui mos fornesementu bee mos ne’ebe ho kualidade iha ospital ne’e.
Entretantu Administrador HNGV, Rui Manuel Gago Exposto hateten stok aimoruk ne’ebe governu Korea fo ne’e sira sei hare atu bele fahe ba Sentru Saúde no Ospital Referral sira iha teritoriu tomak ne’ebe presiza aimoruk sira ne’e hanesan Sarope mear ba labarik, parasetamol, Kotri no seluk tan tanba stok barak liu no nia frazu to’o deit iha tinan 2014.
“Governu Korea fo supporta ba HNGV iha buat barak hanesan ita hotu hatene makina CT-Scan ne’ebe supporta husi governu Korea maske agora sei parado maibe antes ne’e ami fo ona atendimentu ba pasiente kuaze trezentus I tal no makina Haemodealisa unidade rua ne’ebe agora dadaun halo hela operasaun ba pasientes sofre moras rins,” dehan Administrador Exposto.
Nia espera katak ba futuru governu Korea bele fo apoiu nafatin iha area kapasitasaun no fornesementu ba bee mos ne’ebe ho kualidade ba HNGV, nune’e labele prejudika ekipamentus medikus liu-liu iha sala operasaun nian.
Nia informa mos katak, iha ekipa ida mai husi Korea ne’ebe halao ona peskiza iha fulan hira kotuk liu ba sei mai fali atu fo apoiu ba HNGV atu hala’o operasaun ba moras rins uza laser ne’ebe sei iha faze diskusaun tanba presiza rekursu ne’ebe formadu.
