“Tinan 2012 ne’e ami komesa fali hanorin lingua Ingles ba joventude no labarik sira hahu husi baziku to’o iha elementary, agora sira la’o dadaun e ami garantia nia kualidade tanba ami nia mestre sira mos sei eskola hotu iha universidade, Dom Bosco no iha SOLS,” dehan Kordenador Programa, Viriato A. Lobato, (15/08), iha nia knar fatin Balide, Dili.
FCJ nudar Organizasoens Non Governmentais (ONG) ne’ebe durante ne’e tau matan no fo protesaun ba labarik inklui joventude sira ne’ebe konflitu ho lei, halo advokasia ba sira.
Tuir nia, programa hasa’e kapasidade ba joventude no labarik ne’e la’os foin mak hala’o, maibe desde 2009 to’o agora e iha joven lubun bo’ot ida mak hetan ona kapasitasaun husi FCJ , e husi sira ne’e balun hetan ona servisu iha instituisuan governu no setor privadu, no balun mos kontinua estudu iha universidade.
Kursu Ingles ne’e ho durasaun fulan tolu deit no joventude, labarik hamutuk 120 resin mak tuir kursu ne’e, e kada fulan partisipante sira selu deit $3.
Iha parte seluk Partisipantes Joni Fatima, sente kontente ho kursu ne’e tanba alende baratu,mos tanba besik uma. “Ami ladun puas tanba kursu ne’e semana ida dalatolu diet hasoru malu,”.
“Hau hanoin ami foin tuir loron rua deit tanba ne’e, ami seidauk hatene kona ba kualidade treinador sira maibe hau hanoin iha duni kualidade maske la’os ema estranjeiru hau fiar treinador Timor oan sira ne’e mos hatene tanba sira tuir ona formasaun barak balun iha SOLS, Dom Bosco no seluk tan,” dehan Fatima.
Alende ne’e Joventude Anacleto Soares ne’ebe partisipa iha kursu ne’e dehan, seidauk bele fo komentario ba formasaun ida ne’e tanba sira foin hahu iha segunda feira maibe nia espera katak formasaun ne’ebe nia tuir bele fo benefisio ba nia moris tanba lingua Ingles importante tebes ba se deit bainhira hakarak buka servisu tantu iha rai laran no liur.
