“Tenke buka tuir kilat hirak ne’e, tanba ema ne’ebe maka iha direitu atu kaer kilat ne’e polisia no forsa defeza hodi asegura seguransa iha rai laran ne’e, la’os ema hotu-hotu hakarak kaer kilat,” sujere Deputadu David Diaz Ximenes, (14/08), iha Parlamento Nasional.
Entretantu tuir Segundu Komandante Polisia Nasional Timor-Leste (PNTL), Komisariu Afonso de Jesus katak kilat 31 ne’e kompostu husi pistol iha 27, kilat bo’ot ho marka K 33 tolu inklui kilat ida tan ne’ebe lakon foin dadauk ne’e.
“Polisia nafatin esforsu oinsa maka atu bele hetan fila-fali kilat hirak ne’e, maibe ami mos husu koperasaun husi komunidade atu bele servisu hamutuk, wainhira sente katak nasaun ne’e ita hotu nian, tenke iha konsiensia atu entrega hikas mai polisia,” Komisariu de Jesus esperansa.
Enkuantu tuir Komunidade ne’ebe maka lakohi publika nia identidade katak, ida ne’e perigu tebes no polisia tenke buka tuir lalais.
“Kilat ida maka lakon mos ne’e ladiak ona, sa’tan kilat 31 mak lakon e ita lahatene nia paradeiru iha ne’ebe, ne’e perigoju tebes,” preokupa Komunidade ne’e.
