Iha tinan primeiru iha mandatu foun nudar Ministru Edukasaun (ME), Bendito Freitas, sei hare liu ba programa prioridades iha area edukasaun nian, liu-liu ba sistema kurikulum Ensino Baziku nian.
“Hau sei halo enkontru ho Diretores sira, atu hare kona ba programa prioridades ba area programatis ne’ebe maka bele responde, maibe importante agora ne’e maka sistema kurikulum Ensinu Baziku maka sai asuntu prioridade,” hateten Ministru Edukasaun Freitas, foin lalais iha Dili.
Alende kurikulum Ensino Baziku, tuir nia, problema importante seluk oinsa maka bele kria infraestrutura ne’ebe maka diak iha eskola hotu, nune’e alunus sira bele eskola ho diak, no profesores sira mos bele halo’o sira nia knar ho diak.
Entretantu Deputadu Mateus de Jesus hateten, ne’e progama ne’ebe diak, karik sistema ne’ebe durante ne’e iha, ladun fo benefisu ba alunus sira.
“Karik sistema ne’ebe maka ita uza iha pasadu ladun fo benefisiu ba estudante hotu-hotu husi nivel baziku to’o nivel superior, entaun Ministeriu bele muda ou bele aumenta tan kurikulum, hodi bele aselera prosesu aprendizajen ho diak,” Deputadu de Jesus tenik.
Tuir nia, ho kurikulum ne’e maka bele orienta profesores sira iha prosesu aprendizajen.
