Autoridade local iha Suku Nipane, Sub-distritu Pante Makasar, Distritu Oe-Cusse ejiji ba Governu atu harii postu permanente Unidade Polisia Fronteira (BPU) iha Sacato ne’ebe uluk detroi tiha to’o agora seidauk hadia fali.
“Hare ba kondisaun ita nia Polisia Fronteira sira iha Sacato tristi los, governo hari tiha postu integradu maibe la inklui fatin hela ba sira, kuitadu sira toba deit iha fatin ne’ebe la merese atu sira toba,” preokupa Xefe Suku Nipane, Ancelmos Colo, foin lalais iha Oé-Cusse.
Xefe Suku Colo sujere, atu governu urjentemente asuntu ne’e tanba tempu udan besik dadaun ona, e alende ne’e ida ne’e fo imajen la diak ba nasaun vizinu Indonezia.
“Hau nudar Xefe Suku sujere ba parte governu li-liu kintu governo atu tau prioridade ba area seguransa hanesan UPF atu labele kontinua moris hanesan ne’e,” xefe Suku ne’e sujere.
Entretantu Eis Administrador Distritu Oe-Cusse, Jose Tanesib Anunu promote, sei hato’o kestaun ba iha governu sentral hodi buka solusaun ba problema ne’e.
“Ami foti alternativa hodi haruka ita nia membru polisia UPF sira hela iha fatin mamuk, hodi hein governu konstroi fatin foun ba sira, e ita lakohi para ita nia seguransa hela ho kondisaun provizoriu nafatin,” dehan Eis Administrador Anunu.
