Hafoin Diresaun Nasional Transporte e Terestres (DNTT) Nasional hasai despaixu ho numeru 10/DNTT/2012, hahu dia 01 Junu bandu DNTT rejionais (Maliana, Baucau, Same inklui Distritu Oe-Cusse) atu simu no rejistu kareta no motor foun no tenke konsentra iha nasional, halo komunidade sira lamenta.
Motorista Francisco Taeki husi Distritu Oe-Cusse lamenta ho desizaun foun ne’e tanba sira tenke hasai fali osan barak liu tan selu transporte mai trata sira nia dokumentus iha Dili.
“Dehan ita atu tama ba iha desentraliza, fo poder mai iha distritu, maibe tanba sa maka dada fila fali poderes ba iha nasional, kuandu trata dokumentu ita sei halai ba Dili, selu osan ro nian inklui osan akomodasaun nian, e depois funsiunariu sira iha ne’e atu halo saida tan, to’o fulanhein simu osan deit ga,” preokupa Motorista Taeki, (02/08), iha Oe-Cusse.
Tuir nia, tempu ona atu desentralisa servisu husi nasional mai rejional, la’os kiik bo’ot tenke konsentra hotu iha Dili “Se nune’e ita la’os atu ba oin maibe ba fali kotuk,”.
Preokupaasaun hanesan hato’o mos husi Komunidade Francisco Bano, e nia konsidera desizaun govenu nasional ne’e hanesan lalaok lakon fiar no la valoriza kapasidade fungsiunariu sira ne’ebe servisu iha diresaun durante ne’e.
“Nudar sidadaun hau la konkorda ho politika ikus-ikus ne’e, la’o fali ba kotuk inves ita hakat ba oin maske hasoru problema ka progresu atu bele sai referensia ba ita,” dehan Komunidade Bano.
Tanba ne’e nia husu ba governu sentral atu desntraliza hikas rejistu veikulu iha Distritu Oe-Cusse.
Entretantu Administrador Distritu Oé-Cusse, Jose Tanesib Anunu mos lamenta tebes ho desizaun governu sentral ne’e no husu atu tetu didiak, nune’e labele hamosu problema foun iha komunidade nia le’et.
“Governu sentral presiza konsidera mos autoridade lokal distritu nian molok hasai despaixu tenke halo uluk sosiliazasaun ba komunidade sira,” Administrador Anunu fo hanoin.
Wainhira TDW tenta konfirma asuntu ne’e ho Diretor Transporte Terestres Distritu Oé-Cusse Vitor Teme, maibe nia lakohi fo komentariu tanba ne’e kompetensia governu sentral.
