“ONU iha Timor-Leste laran haksolok tebes kona ba nomeasaun Emilia Pires ba Sekretariu Jeral ONU nia Panél Nivel Aas ho ema Eminente sira ba ajenda dezenvolvementu mundial postu 2015, ida ne’e hatudu katak Timor-leste iha papel importante atu hala’o hodi determina ajenda dezenvolvementu global,” hateten Reprezentante ONU iha Timor-Leste, Finn Rieske-Nielsen, (03/08), iha Kaikoli, Dili.
Tuir nia, ida ne’e bele sai ezemplu diak ne’ebe hatudu katak Timor-Leste asume lideransa hodi promove dezenvolvementu sustentavel no luta hasoru kiak.
Entertantu Xefe Gabinete Ministra Finansas, Jose Abilio hateten, Ministra sei fo nia kontribuisaun ba panel ida ne’e tanba Ministra iha esperiensia barak ona.
“Nudar prezidente ba G7+ nia mos iha esperiensia barak, ne’e duni hau fiar katak nia bele kontribui ba iha surumutu ne’e kona ba oinsa atu bele fo hanoin ba dezenvolvementu ekonomia iha mundu ba tinan 2015 oin mai, no seluk tan durante tinan lima iha kintu governu konstitusiaonal ne’e iha mos mudansa barak iha parte ekonomia ne’e duni hau fiar katak ho esperensia sira ne’e nia mos bele fo nia hanoin ba surumutu ne’e” dehan Xefe Gabinete MF ne’e.
Tuir nia, oportunidade ne’e nudar dalan nebe maka diak, atu hatudu mos Timor oan nia kontribuisaun ba dezenvolvementu mundial ne’e.*
