“Konselhu Admistrasaun sei aprova tiha dokumentu ida fahe ba deputadu sira ne’ebe agora dadauk uza kareta ne’e, para atu halo tuir dokumentu ninia husu presu ne’e hira e se mak iha direitu,” hateten Deputadu Pedro da Costa , (30/07), iha PN.
Tuir Deputadu da Costa, Parlamentu la presija halo rezolusaun ida maibe KAPN) foti deit desizaun ida hodi rezolve kestaun ne’e.
Entertantu Eis Deputadu Manuel Tilman hateten, iha dekretu lei iha Ministeriu Finansas nian katak, kareta tuan sira ne’ebe mak Deputadu tuan sira uza, bele halo fali lelaun ba publiku sira.
“Hau hanoin kolega Deputadu sira foun ne’e sei foti modelu referensia ida ba dekretu lei ida halo lelaun ba asset estadu nian,” Eis Deputadu Tilman tenik.
Tanba ne’e Deputadu tuan sira tenke aprezenta kareta sira ne’e, nune’e bele halo avaliasaun tanba kareta balun at tiha ona.
Iha sorin seluk eis Deputadu husi Bankada Partidu Unidade Nasional (PUN), Domingos Mesquita dehan KAPN deside ona atu halo lelaun deit ba kerata sira ne’e. “ne’ebe agora ita hein deit kareta hirak ne’e lelaun ho folin hira-hira,” Eis Deputadu dehan.*
