Moras ne’ebe rejistu maka’as iha Klinika Very Important Personal (VIP) Parlamentu Nasional (PN) durante ne’e mak tensaun, tanba ho otas ne’ebe membrus Parlamentu sira iha fasil tebes atu hetan moras ne’e, liu-liu bainhira halo debate Orsamentu Jeral du Estadu (OJE).
“Ita hatene deit ona ita nia nai ulun sira iha Parlamentu ne’e bainhira sira halo debate orsamentu, sira sempre kona moras tensaun no kolestrol, enkuantu moras kanker jarang,” hateten Enfermeira Filomena Lin, ne’ebe haknar aan iha Klinika ne’e, (02/08), iha PN.
Klinika ne’ebe estabelese iha 2009 ne’e atende deit membrus PN inklui mos Governu ne’ebe tuir forum debate ba asuntu ruma, no ba funsiunarius bai-bain atende bainhira iha moras emerjensia.
Alende ne’e iha klinika ne’e iha deit Enfermeira ida no Mediku estrangeirus ida mak durante ne’e fo atendementu saúde ba pasiente espesial sira iha PN.
Enferimeira ne’e informa, iha semana kotuk Klinika PN ne’e menus aimoruk hanesan Amlodoping, Sibastating no Sangobion tanba ne’e bainhira Deputadus sira mai halo tratamentu , sira fo deit reseita hodi ba foti aimoruk iha Ospital Nasional.
“Maibe agora la’o normal tanba aimoruk kompletu ona, se membru deputadus sira hakarak ba halo konsulta diak liu iha ospital bo’ot, klinika sei halo karta transferensia (rujukan) ba ospital atu sira bele halo tratamentu iha ne’eba,” dehan Enfermeira ne’e.
Iha parte seluk Deputada Virgina Ana Belo ne’ebe foin ba halo konsulta dala ida iha Klinika ne’e dehan, atendimentu emfermeirus no mediku nian ba pasiente sira diak tebes tanba fasilidade no aimoruk mos kompletu.
“Hau hanoin ita nia Mediku Timor oan barak bele tau sira iha ne’e hodi fo atendeimentu ne’ebe diak ba Membrus Deputadus sira la presiza tau Mediku estrangeirus sira,” sujere Deputada ne’e.
