Portu Komponente Naval nian iha Hera ne’ebe agora tohar, tuir Fundasaun Mahein (FM) tanba kompania ne’ebe kaer obra ne’e antes ne’e la halo estudu viabilidade.
“La hakfodak kuandu Portu Hera ne’e tohar, tanba portu ne’e halo la tuir estudus ida, kompania ne’ebe maka kaer projeitu ne’e uluk kria tiha ona problema depois ita selu tiha un miliaun dolar, maibe ita rekruta fali para nia kontinua no agora dadaun portu ne’e tohar ona, ne’e ita koalia kona ba dignidade nasaun ne’ebe maka kompania ida hodi halimar tiha deit, tanba la tuir akordu ne’ebe maka nasaun nia hakarak” dehan Diretor FM, Nelson Belo, (30/07), iha Balide, Dili.
FM mos husu ba Governu atu halo obra saida deit liu-liu iha area defeza no seguransa tenke iha estudu ida.
Entertantu Sekretariu Estadu Defeza (SED), Julio Tomas Pinto dehan, ne’e responsabilidade kompania ne’ebe kaer obra ne’e.
“Kestaun ne’e sei nafatin responsabilidade kompania ninian,” dehan SE Pinto.
Enkuantu tuir Deputadu Inacio Moreira, presiza halo investigasaun klean kona ba asuntu ne’e.
“Konstrusaun ne’e uza osan bo’ot, e aleende osan bo’ot konstrusaun ne’e mos kleur tebes ona, ne’e sai problema bo’ot, ne’e duni presiza halo investigasaun ba ida ne’e, nune’e bele hatene sala ne’e iha ne’ebe los,” Deputadu ne’e sujere.
